Almaty qalasynyń Jolaýshylar kóligi jáne avtomobıl joldary basqarmasynyń jańa basshysy bolyp Talǵat Hoschanov taǵaıyndaldy. Sońǵy eki jylda ol osy mekeme basshysynyń orynbasary bolǵan.

Basqarmanyń jańa basshysy úshin qala joldaryn barynsha sapaly ári der kezinde jóndeý kezek kúttirmeıtin mindet bolyp tabylady. Sońǵy jyldary megapolıste 180 km jol jáne 700 km ınjenerlik jeli salyndy jáne jóndeldi. Bıylǵy jyly uzyndyǵy 155 km bolatyn 157 kósheni jóndeý josparlanǵan, birneshe jolaıryqtary salynyp, magıstraldy kósheler úńgilenýde.

«Qala júrginshi úshin» qaǵıdasy aıasynda uzyndyǵy 30 shaqyrymnan asatyn jańa trotýarlar salynýda jáne jóndelýde. Óz kezeginde Baýyrjan Baıbek basqarmanyń jańa basshysyna barlyq 157 kósheni jóndeý kezinde júrginshi joldaryn talapqa saı jańartý qajettigin tapsyrdy. Bulardan ózge, júrginshi qozǵalysyn qıyndatatyn trotýarlardaǵy túrli qurylystar zertteledi.

Almaty ákimi qalanyń kólik júıesin odan ári modernızasıalaý boıynsha naqtyly tapsyrmalar berdi. Ótken jyly qalanyń avtobýs parki 30%-ǵa jańardy. Jeke tasymaldaýshylar esebinen bıylǵy jyly taǵy 600 jańa avtobýs alý josparlanǵan, ol qalanyń avtobýs parkin 70%-ǵa deıin jańartýǵa múmkindik beredi.