Almaty ákimi Baýyrjan Baıbek Danıa Koróldiginiń Tótenshe jáne Ókiletti Elshisi Tomas Vınklermen kezdesti. Taraptar saýda-ekonomıkalyq jáne mádenı-gýmanıtarlyq baılanystardy nyǵaıtý máselelerin talqylady.

Búgingi kúni Danıa ekonomıkasy álemdegi naǵyz «jasyldardyń» biri bolyp tabylady, al Kopengagen «Smart sıtı» reıtıńinde birinshi orynda tur.

Tomas Vınkler óziniń sózinde týrızm salasynyń áleýeti joǵary ekenin, dattardyń Orta Azıaǵa úlken qyzyǵýshylyq tanytatynyn, al Almaty óńirdi tereń tanýdyń bastaýy bolatynyn aıtty.

«Meniń Almatyda sońǵy ret bolǵan kezimnen beri qaraı qalaı qatty ózgeripti, megapolıs jedel qarqynmen damýda. Jańa jaıaý júrginshi aımaqtary men velosıpedshiler ınfraqurylymy erekshe kóz tartady», - dep atap ótti Danıa Koróldiginiń Elshisi.

Jumys sapary barysynda dat kompanıalarynyń kólik, densaýlyq saqtaý, energetıka salalarynyń ókilderi Indýstrıaldy aımaq pen «ITK» AEA-nyń potensıalyn zerttedi, sonymen qatar Almatynyń birqatar kásiporyndarynda bolyp, taqyryptyq kezdesýler ótkizdi.

Aıta keterligi, sońǵy jyldary Almaty men Danıa arasyndaǵy taýar aınalymy 43% -ǵa artyp, 30 mln. AQSH dollaryn qurady.