Kún saıynǵy jumys sapary kezinde Baýyrjan Baıbek Almatynyń kólik jáne júrginshi ınfraqurylymy qurylysynyń barysyn tekserdi. Megapolıs basshysy birneshe saǵat ishinde Abaı, Baıtursynov, Asqarov, Gagarın kóshelerin aralap shyǵyp, olardy odan ári kóriktendirý boıynsha birqatar tapsyrmalar berdi.

Aıdyń sońyna deıin Gagarın dańǵylyn Ál-Farabıden Tımırázev kóshesine deıin qaıta jasaý aıaqtalady. Uzyndyǵy 3 shaqyrymnan asatyn jańarǵan jolmen qatar júrginshi trotýarlary abattandyrylyp, aryq jelileri salynady. Paıdalanylmaıtyn konstrýksıalar men zańsyz qurylystar alynýda, sonan soń kóshelerdi jasyldandyrý josparlanǵan.

Júrginshilerdiń qaýipsizdigin qamtamasyz etý úshin stıhıaly kólik turaqtarynyń ornyna dańǵyl jıegindegi trotýarlar qalpyna keltirilýde. Qalalyqtardyń talabyn eskere otyryp, Gagarın men Qojabekov kósheleriniń qıylysyna baǵdarsham ornatý múmmkindigi qarastyrylýda.

Almaty ákimi Baıtursynov kóshesin aralaǵan kezde zańsyz salynǵan kafeniń jazǵy terrasyn alyp tastap, júrginshi ýchaskesin qalpyna keltirýdi tapsyrdy.

«Baykonyr» bıznes-ortalyǵy aldyndaǵy júrginshi aımaǵy keńeıedi, kólik turaǵy jińishkeredi.

Jaıly qala keńistigin qurý maqsatynda megapolıs basshysy Asqarov kóshesi boıynda trotýar qurylysyn bastaýdy tapsyrdy.

Eske salsaq, bıylǵy jazda Almatyda 150 kóshe jóndeledi, 30 km trotýarlar jasalady, 600 aýla kóriktendiriledi. Barlyq jer asty ótpeli joldar kúrdeli jóndeledi, jańa fontandar salynady. Buryn qaıta jasalǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańynan ózge megapolıstiń birqatar negizgi dańǵyldary túgeldeı jańarady.