Almatyda UBT ótkizýdiń sharalary qolǵa alyndy. Bul týraly qalalyq Bilim basqarmasynyń basshysy Gúlnar Hodjabergenova aıtty.

Basqarma basshysy UBT kezinde aqparattyń qupıalyǵy men adamı faktordy boldyrmaý sharalaryn JOO quzyrynda ekenin aıtty. «Aýdıtorıalardyń daıyndyǵy, tehnıkalyq qajettilikterdi JOO basshylyǵy qamtamasyz etedi. Qazir JOO-lar 182 kamera, 102 uıaly telefon baılanys sıgnaldaryn tunshyqtyrý quralyn, 31 metal izdeý quralyn, 7 ramalyq metalodetektor satyp aldy», - dedi basqarma basshysy Gúlnar Hodjabergenova «Nur Otan» partıasy bólimshesiniń baspasóz ortalyǵynda.

Onyń aıtýynsha, Almatyda UBT 8 oqý ornynyń bazasynda ótkiziledi. «UBT kezinde túlekterdi test tapsyrý ornyna jetkizý úshin İİD qyzmetkerleri bólinedi. Sondaı-aq, tańǵy 8-den bastap JOO bazasynda polısıa men jedel járdem kezekshilik júrgizetin bolady», - dedi basqarma basshysy. Sonymen qatar, testileý kezinde tártipti QR BǴM bekitken memlekettik komısıa qadaǵalaıtyn bolady. Ázirge UBT qashan ótetini belgisiz.  Buǵan deıin habarlaǵanymyzdaı, bıyl Almatyda mektep túlekteriniń 80 paıyzy, ıaǵnı 7300 oqýshy UBT tapsyrady.