Búgingi qoǵamda «Ýoll-strıt qasqyry» atymen tanymal amerıkalyq bıznes-jattyqtyrýshy Djordan Belfort Almatyda ótken «Synergy Global Forum» kásipkerler forýmyna qurmetti qonaq boldy.
Leonardo Dı Kaprıo túsken Martın Skorsezeniń «Ýoll-strıt qasqyry» fılminen keıin tanymal bolǵan Djordan Belfort Almatyda ótken forýmda eki saǵat sóz sóılep, almatylyqtarmen jetistikke jetýdiń joldarymen bólisti. Ol ónimge degen senim men sendirý kúshi jetistiktiń kilti deıdi. Osy erejemen alǵa umtylǵan ol ótken ǵasyrdyń 90-jyldarynda múltımıllıonerge aınalǵan.
«Birinshiden, klıentpen sóılesý kezinde oǵan unaıtyn usynys jasaýǵa nebári 4 sekýndyńyz bar. Biz adamdy bir kórgennen tanımyz jáne oǵan ne usyný kerek ekenin túsinemiz. Sondyqtan onyń nazaryn birden aýdarý óte mańyzdy. Ekinshiden, óz jumysyńyzdy qulshynyspen oryndańyz. Sonda klıent sizge senim artady. Úshinshiden, óz salańyzdyń mamany bolyńyz. Siz ózińizge degen senimińizdi kórsete bilińiz. Sizge senim artqan adamnyń bar máselesin sheship beretin deńgeıdegi adam retinde kórinýińiz kerek. Búginniń satýshylary ózi senim artqan ónimderdi ǵana satýy tıis», - deıdi Djordan Belfort.
Djordan Belforttyń baı bolýǵa degen talaby Nú-Iorktyń Kvıns okrýgindegi Beısaıd qalashyǵynda ómir súrgen kezinde paıda bolǵan. Ol mektepti bitirgen kezde dosymen birge jaǵajaıda balmuzdaq satyp, alǵashqy 20 myń AQSH dollaryn tabady. 23 jasynda et satýmen aınalysyp, óziniń jeke kompanıasyn ashady. Odan keıin bankrotqa ushyraıdy. Biraq Belfort qulshynysyn joǵaltpaı, broker bolýǵa bel býady. Osy sátte ol óziniń naǵyz satýshy ekenin túsinedi. Fılmniń sújetine nazar aýdarsaq, ol esirtkige berilip, keıingi ǵumyryn oıyn-saýyqpen ótkizbek bolǵan. Biraq mıllıonerlerge arzan aksıalardy satý onyń eń basty qateligi boldy. Onyń bıznesi júrmeı, eshkim oǵan senim artpaı qoıyp, aqyry túrmege túsedi. Al bostandyqqa shyqqannan keıin ózine degen senimin nyqtap, suranysqa ıe bıznes-jattyqtyrýshyǵa aınalady.
«Fılm joǵary deńgeıde túsirilgen. Biraq tabysqa jetýdiń ózge de joldary bar ekenin uǵyný kerek. Túrmege túsken azamattardyń basym bóligi keıingi ómirin qaıta qalpyna keltire almaıdy. Bul árıne maǵan qatysty aıtylǵan joq. Men týraly fılm túsirildi. Eki kitap jazyp, óz tájirıbemmen bólisý arqyly qarajat taýyp júrmin. Eger arzan emes, shynaıy qundylyǵy bar aksıalardy satýmen aınalysqanymda, odan da kóp tabysqa jetken bolar edim. Arzan aksıalardy satyp, tezirek tabysqa jetkim keldi. Jettim de. Biraq bul meniń qateligim jáne ómirden alǵan sabaǵym boldy. Al qazir bıznes-jattyqtyrýshy retinde adamdarǵa bıznesti durys jolmen qurýdyń joldaryn úıretip kelemin», - deıdi Belfort.
HHİ ǵasyrda adamdar ózderi unaıtyn isti izdeýge beıimdeldi. Mysaly, qarapaıym keńse qyzmetkeri stılıske aınalsa, eshkim de tańdanbaıdy. Belfort óz isińdi súıýden bólek tabysqa jetýdi de bilý qajet ekenin aıtady.
«Eger siz ózińizge unaıtyn ispen aınalysqyńyz kelip, biraq ol tabys alyp kelmeıtin bolsa, qosymsha tabys kózin izdeńiz. Nemese ishteı senimsizdik paıda bolmaýy úshin óz standarttaryńyzdy tómendetińiz», - deıdi ol.
«Ýoll-Strıt qasqyry» fılminiń arqasynda adamdar Djordan Belfortty «ǵasyrdyń eń uly qarjy alaıaǵy» atymen kópke deıin tanıtyn bolady. Ol balalary úshin túrmeden shyǵyp, bárin qaıta bastaýǵa óz boıynan kúsh taba aldy. Taǵdyrdyń tálkegine qaramaı, qaıtadan tabysty kásipkerge aınalyp, qyzy men ulyna qamqor bola bildi.
