Almatyda Eýrazıalyq medıaforým alańynda álemniń 60 elinen 600 tarta belgili maman 15-jyl qatarynan bas qosty, dep jazady Qamshy.kz aqparat agenttigi.

I Eýrazıalyq medıa forým osydan 16 jyl buryn Almatyda tuńǵysh ret ótken bolatyn. Búgin 8 jyldan keıin Almaty qaıtadan sheteldik jáne elimizdiń túkpir-túkpirinen kelgen medıa salasynyń ókilderin qarsy alýda.

«Evolúsıanyń 15 jyly: qubylmaly dúnıe jáne bizge ózgeris ákelgen álem» degen taqyrypta ótip jatqan Eýrazıa Medıa Forýmynyń ashylýyna Elbasynyń quttyqtaý hatyn Aqparat jáne komýnıkasıalar mınıstri Daýren Abaev oqyp berdi.

Mereıtoılyq medıaforým barysynda belgili qazaqstandyq jáne sheteldik BAQ salasynyń maıtalmandary tájirıbelerimen bólispek.

Almatyda ótip jatqan Eýrazıalyq medıa forým barysynda uıymdastyrý komıtetiniń tóraıymy Darıǵa Nazarbaeva «Ashyq ınternet alańy tek qana talantty jýrnalıserge ǵana esik ashqan joq. Sonymen qatar, aqparattyq soǵystyń kózge kórinbeıtin sarbazdaryna da jol ashty. Feıktermen trolder jalǵan aqparat shyǵaryp, qoǵamdyq pikirge yqpal ete bastady. Olardyń qasynda tabloıdtar abyroıly bolyp otyr. Ǵalamtordyń qarqyndy damýy, áleýmettik jelilerdiń ómirdiń ajyramas bóligine aınalǵany álemdi túbegeıli ózgertti. Devaıstar men gadjetter qoljetimdi. Bul kez kelgen adamnyń medıproseske qatysýyna kepildik berip otyr. Blogerler men jelilik avtorlar bedeldi jýrnalısermen básekege túsip jatyr. Sonyń kesirinen iri basylymdar tıraj joǵaltýda», - deıdi.

Al, Syrtqy ister mınıstri Qaırat Ábdirahmanov «Halyqaralyq qatynastardyń evolúsıasy: ǵalamdaǵy salqyn lep» taqyrybyndaǵy Eýrazıalyqmedıa forýmynyń birinshi plenarlyq otyrysynda sóılegen sózinde «Zamanaýı álemdegi týrbýlenttik pen boljamsyzdyqtyń artýy buqaralyq aqparat quraldarynyń mańyzdylyǵyn arttyrdy», - dep málimdedi.

«Medıaforým - aqparat almasýdyń teńdessiz alańy. Sizder BAQ betinen kórip júrgen tulǵalardan aqparat alyp, qyzyqtyrǵan máselelerińiz jaıly suraı alasyzdar», - dedi kýrd jýrnalısi Mohamad Ahmad Albrazı.

Búgin forým alańynda Iýsýf Omar, Ulybrıtanıadaǵy áskerı jýrnalıs Shahıd Týláganov, «New Eastern Europe» jýrnalynyń bas redaktory Ivona Raıhardt, saıasatker Bartosh Rydlınskı, konsýltant Shýbert Medıa Taıra Shýbert, CEO Select Communication Group jýrnalısi Vıktor Elıseevtiń sheberlik sabaqtary ótti.

«EAMF 2018 zamanaýı aqparattyń naryqtaǵy asa ózekti máseleler: ózara yqpaldasý múmkindikteri, aqparattyq tehnologıalardyń qarqyndy ósýi talqylanady. Osy forým nátıjesinde kelýshilerge kóp jyldyq tájrıbemiz ben bilimimizdi, zamanaýı syn qaterlerge jaýabymyzdy pash etetin bolamyz», - dedi Eýrazıalyq medıaforýmnyń bas dırektory Rýslan Jemkov.

Osyǵan deıin forýmdarǵa BBC ókili retinde qatysyp júrgen Shahıda Týláganova áskerı korespondent retinde qaýipti aımaqtarda derekti fılm jasaý barysynda jınaqtaǵan tájirıbesimen bólisti.

EAMF 2018 Almatyda 3 kún qatarynan ótedi.

Aıta ketetin bolsaq, ótken jyly Astanadaǵy EKSPO-2017-niń Kongres-ortalyǵynda «Ymyraǵa kelý joldaryn izdestirý» taqyrybynda XIV Eýrazıalyq medıa-forým ótken bolatyn.