Kúle bilý - ómir, kúldire bilý - óner. Almatyda oıy men sózi júırik, taban asty tapqyr jastar sahnada qaýyshty. Óıtkeni, Alyp shaharda kóńildi tapqyrlar klýby qaıta jumysyn bastady. Alǵashqy gala-konsertte 19 komanda óner kórsetti. Al fınalǵa tek myqtylary ǵana joldama alady. Sońǵy sózdi toptardyń ázilderine baǵa beretin ádilqazy alqasy múshesi aıtady.

Bul janǵa dárý kúlkini ótkir qarýǵa aınaldyrǵan jastar. Olar ár sekýnd saıyn ázildep, jurtty qyran-topan kúlkiniń astynda qaldyrdy. Astarly qaljyńdy birden túsingen kórermender qolpashtap jatyr. Óıtkeni, jurt kúlki festıvalin saǵynyp qalǵany baıqalady. Bıyl Almatydaǵy lıgany tájirbıesi mol, elge tanys ázilqoılar qolǵa alǵan.

«Almaty lıgasy jalpy KVN, Qazaqstandaǵy KVN burynnan bolǵan. Biz jaı ǵana sónip qalǵan otty odan saıyn jandandyryp jiberdim desem, qatelespespin. Óıtkeni, birinshiden sebebi nede? Ne úshin ashtyq? Turyp qalǵan komandalar, oınaýǵa óziniń jalpy yqylasy bar, oınaım degen nıettegi komandalarǵa osyndaı bir alań uıymdastyryp, osyndaı oınaıtyn lıga bolsa eken», - dedi Kóńildi tapqyrlar klýbynyń júrgizýshisi Erkebulan Myrzabekov.

Almaty lıgasynyń sahnasyna 45 komanda óner kórsetýge nıet bildergen. Alaıda, ázilqazy músheleri men redaktorlar onyń tek 19-yn tańdap alypty. Tartysty talas ary qaraı da jalǵasady deıdi uıymdastyrýshylar. Aıta keteıik, lıgaga elimizdegi ár túrli ýnıversıtetterinen kelgen stýdentter qatysyp jatyr.

«Ár komandanyń qaıtalanbas óz stılderi qalyptastan. Sondyqtan kórermen úshin olardyń oıyndaryn kórý qyzyq bolaıyn dep tur. Elimizdiń ár óńirinen kelgen toptardan bólek Ózbekstan, Qyrǵyz, Reseıden de qatysyp jatqandar bar», -dedi Kóńildi tapqyrlar klbýynyń redaktory Marat Oralǵazın.

Alǵashqy festıvál bul tek tartystyń basy ǵana. Kil myqty komandanyń esimi jeltoqsan aıynda belgili bolady. Jeńiske jetkender tek kýbokka ǵana emes, halyqaralyq Sochıdegi festıválge joldama alady.