«Máńgilik polk» Almatyda dástúr boıynsha ótedi. Batyr babalarynyń sýretin qushaqtaǵan 120 myńnan asa almatylyqtar birneshe kóshe boıymen júredi. Uıymdastyrýshylardyń aıtýynsha, sherýge qatysýshylar túrli suraqtarymen habarlasady. Mysaly, ekinshi dúnıejúzilik soǵysqa qatysýshylardyń sýretterine qoıylatyn talaptar bar ma nemese jeńis kúnine qandaı sharalar uıymdastyrylatyn bilgisi keletinder kóp eken. Al bul suraqtarǵa jaýap izdegen áriptesim Azamat Áýezhan stýdıaǵa shyǵyp aıtyp bermek.

-Azamat, Uly Otan soǵysy ardagerlerine bıyl qandaı qurmet jasalmaq?

-Qaıyrly kesh, Toǵjan. Jeńis kúnine arnalǵan negizgi is-sharalar týraly sálden keıin aıtyp bereıin. Aldymen ardagerlerimizge jasalatyn jaǵdaıǵa toqtalsam.

 Sonymen Eńbek jáne halyqty áleýmetti qorǵaý mınıstrliginiń aqparatyna júginsek, Qazaqstanda 2067 Uly Otan soǵysynyń ardageri bar. Onyń kóbi, ıaǵnı 369-y Almaty qalasynda. 260-y soǵysqa qatyssa, qalǵan 109-y ekinshi dúnıedúzilik soǵystyń múgedekteri. Olarǵa teńestirilgender sany 4073-ti quraıdy. Qaladaǵy ardagerler úıinde turaqty túrde 7 adam turyp jatyr. Uly Jeńistiń 73 jyldyǵyna oraı olardyń árqaısysyna dástúrge saı bir rettik tólem jasalady.

«Bıyl Almaty qalasy ákiminiń sheshimimen Uly Otan soǵysynyń ardagerlerine tólenetin tólemniń kólemi kóbeıtildi. Eger ótken jyly 150 myń tólense, bıyl ardagelerimiz ben soǵysqa qatysýshy jáne soǵys múgedekteri 250 myń teńge alady. Soǵys ardagerlerine teńestirilgender 9 mamyrǵa qarsy 30 myń teńge alyp kelse, endi 50 myń teńgeden tólenedi», - dedi Almaty qalasy jumyspen qamtý jáne áleýmettik baǵdarlamalar basqarmasynyń bólim basshysy Laýra Ábjanova.

Tólemderdiń barlyǵy jergilikti búdjetten bólinedi. Degenmen, jaýapty mınıstrlik ol qarajattyń 150 myńnan kem bolmaý kerektigi týraly usynys bergen. Kestege nazar aýdarsaq. Astanada ardagerlerge jarty mıllıon teńgege deıin beriledi. Shyǵys Qazaqstandaǵy ardagerlerdiń alatyny da osyndaı. Soltústik Qazaqstan da onyń kólemi eki ese az - 240 myń teńge. Batysta beretin syılyq áli naqtylanbasa kerek. Ótken jyly batyrlarymyzǵa at jazylǵan saǵat tabystalǵan. Al Qaraǵandy men Pavlodarda 150 myń teńge taǵaıyndaldy. Qarjylaı kómekten bólek, ár óńir túrli qyzmet kórsetedi. Gazetterge jazylý tegin, endi biri tis protezderin salyp, kýrort pen saýyqtyrý oryndaryna jiberedi.

«Biz kýrortta emdelýge ketetin shyǵyndardy jabýdy qolǵa aldyq. Eger ardager memlekettik satyp alýǵa qatyspaǵan emdeý ornynda emdelgisi kelse, qarsylyǵymyz joq, kedergisiz bara alady. Búdjetti jobalaý barysynda belgilengen qun boıynsha joldamanyń baǵasyn ótep beremiz. Bıyl ondaı joldama 109 myń teńge kóleminde», - dedi Almaty qalasy jumyspen qamtý jáne áleýmettik baǵdarlamalar basqarmasynyń bólim basshysy Laýra Ábjanova.

Desek te ardagerlerimiz bılik ókilderine óz usynystaryn joldap otyr. Olar sanatorıada emdelý ýaqyttaryn uzartýdy suraýda.

Almatyda soǵys ardagerlerine aı saıyn 18 myń teńgeden tólenedi. Bul soma adamnyń kirisine táýeldi emes, barlyǵyna birdeı. Al endi 9 mamyr qarsańynda ótetin sharalarǵa toqtalsam. Birinshiden, dástúrge aınalǵan «Máńgilik polk» sherýi besinshi ret ótedi. Astana alańynan bastalǵan sherý  Tóle bı kóshesi boıymen Dostyq dańǵylyna deıin, ary qaraı Áıteke bı kóshesimen júrip, sherý 28-shi Panfılovshylar saıabaǵynda aıaqtalady. Sharaǵa «Máńgilik rota» ekinshi ret qatysqaly otyr. Aýǵan soǵysy, beıbit kúni qyzmette qaza tapqan qyzmetkerlerdiń sýretin ustap, týystary men jaqyndary shyǵady.  «Máńgilik polkqa» bıyl shamamen 120 myń almatylyq qatysady dep josparlanyp otyr. Sherý 40 mınýtqa sozylady. Ata-babalaryn ulyqtaıtyn bul merekege keıbiri tyńǵylyqty daıyndalady eken. Soǵys kezindegi atasynyń jazǵan hattaryn saqtap, qymbat jádiger sanaıtyn shóbereni sózge tartyp kórgen edik.

«Máńgilik polkqa» ekinshi jyl qatarynan qatystym. Bul dástúrdi bıyl da saqtaımyn. Olardyń sýretin alyp sherýge qatysqanda jeńisti alyp bergen batyrlarymyz qasymyzda turǵandaı áser qaldyrady. Jeńis paradyna olar da qatysyp jatqandaı», - dedi Roman Chıplıkov.

Bul jyly almatylyqtardy «Máńgilik polk» sherýi ǵana kútip turǵan joq. Árıne Jeńis kúnine oraılastyrylǵan shara 28-shi panfılovshylar saıabaǵynda ótedi. Budan bólek, soǵys jyldaryndaǵy atmosferany birneshe jerde sezinýge bolady. 

«Soldattarǵa beriletin botqa daıyndaıtyn jyljymaly asqana bolady. Merekelik baǵdarlamalar uıymdastyrylady. Al keshkilik Astana alańynda dástúrge saı konsert ótedi. Onda soǵys jyldaryndaǵy ánder shyrqalady. Jeńisti alyp bergen ata-babalarymyzdy eske alyp, sol kezdegi kóńil-kúıdi seziný úshin árbir adam da merekelik sharaǵa qatysyp, án shyrqaı alady», - dedi Almaty qalasy Mádenıet jáne arhıvter basqarmasynyń basshysy Hanzada Esenova.

9 mamyr kúni ótetin negizgi sharalar legi osyndaı. Uly Otan soǵysy ardagerleriniń kóbisiniń júrip-turýy qıyn. Sol sebepti olardy úıinde quttyqtaıdy. Al merekelik sharalardyń kýágeri bola almaǵan turǵyndar úshin «Almaty» telearnasy tikeleı efırde habar taratady. 14.30 da jáne 15.00-de qala aýmaǵyndaǵy ótip jatqan merekelik baǵdarlamalardy bizdiń arnamyzdan kóretin bolasyzdar.