Elimizde 2 myń 67 Uly Otan soǵysynyń ardageri bar. Onyń, ıaǵnı, 369-y Almaty qalasynda turady. Uly Jeńistiń 73 jyldyǵyna oraı olardyń árqaısysyna dástúrge saı bir rettik tólem jasalady. Astanada ardagerlerge jarty mıllıon teńgege deıin beriledi. Shyǵys Qazaqstandaǵy ardagerlerdiń alatyny da osyndaı. Soltústik Qazaqstanda onyń kólemi eki ese az. Batysta beretin syılyq áli naqtylanbasa kerek. Ótken jyly batyrlarymyzǵa at jazylǵan saǵat tabystalǵan. Al Qaraǵandy men Pavlodarda 150 myń teńge taǵaıyndalypty. Almatydaǵy maıdangerlerge byltyr 150 myń teńge bir rettik áleýmettik kómek kórsetilse, bıyl oǵan taǵy 100 myń teńge qosyldy.

«Uly Otan soǵysynyń qatysýshylary men múgedekterine komýnaldyq qyzmetterge baılanysty tólenetin 5,5 aılyq eseptik kórsetkish kólemindegi áleýmettik kómek mólsheri qazirgi tańda 6,5 aılyq eseptik kórsetkish kóleminde ulǵaıdy»,-dedi Almaty qalasy Jumyspen qamtý jáne áleýmettik baǵdarlamalar basqarmasy áleýmettik tólemder bóliminiń bas mamany Rústem Ismaılov.

Jeńildikter men kepildikter jaǵynan ardagerlerge teńestirilgen tulǵalar, surapyl shaıqasta qaıtys bolǵan jaýyngerlerdiń jesirleri men Aýǵanstandaǵy soǵysta qaza tapqan áskerı qyzmetshilerdiń otbasylaryna buǵan deıin 30 myń teńge kóleminde kómek kórsetilse, taǵy qosymsha 20 myń teńge tólenedi. Bıyldan bastap ataýly áleýmettik kómek jańa formatta berile bastady. Kedeıshilik shegi 40 paıyzdan 50 paıyzǵa deıin kóterildi. Jyl basynan beri bul kómek túri 311 otbasyǵa kórsetilgen.

«Jan basyna shaqqandaǵy ortasha tabysy 2 ese kúnkóris deńgeıinen aspaıtyn azamattarǵa 7,5 aılyq eseptik kórsetkish kóleminen 10 aılyq eseptik kórsetkish kóleminde ulǵaıdy. Órt nemese tabıǵı apattyń saldarynan kórsetiletin áleýmettik kómek qazirgi kezde 100 aılyq eseptik kórsetkish kóleminen 200 aılyq eseptik kórsetkish kóleminde ulǵaıdy»,-dedi Almaty qalasy Jumyspen qamtý jáne áleýmettik baǵdarlamalar basqarmasy áleýmettik tólemder bóliminiń bas mamany Rústem Ismaılov