Halyq júregindegi jaýyngerler. Almatynyń memlekettik ortalyq mýzeıinde Uly Otan soǵysynyń 73 jyldyǵyna arnalyp qaıyrymdylyq sharasy ótti. Almatylyq jastar tyl ardagerlerimen kezdesip, áskerı ómir týraly áńgime tyńdaýǵa múmkindik aldy. Sondaı-aq oqýshylar «Qazaqstan Uly Otan soǵysy jyldarynda» ekspozısıasymen tanysty. Maqsat - jastardy patrıottyq rýhta tárbıeleý. Sebebi, eljandy urpaq qana «Máńgilik el» ıdeıasynyń mánisine jiti úńiledi.
«Úlken-kishi barlyǵy at salysty. Ásker jasyndaǵylar maıdanǵa attandy. Al endi eńbek jasyndaǵylar eńbekpenen aınalysty. Mysaly biz sıaqty balalardyń ózderi azdap mektep arqyly eńbekke aralasty», - dedi tyl ardageri Tóleýbaı Jumasultanov.
Almatydaǵy Memlekettik ortalyq mýzeıde Uly Jeńistiń 73 jyldyǵyna oraı «Halyq júregindegi jaýyngerler» qaıyrymdylyq sharasy ótkizildi. Taǵylymy mol kezdesýge Almaty qalasynda turatyn soǵys jáne tyl ardagerleri qatysyp, qasiretti kúnderdiń aýyr estelikterin áńgimeledi.
Sharany ashqan mýzeı dırektorynyń orynbasary Beıbitqalı Qaqabaev Jeńis kúnin jas urpaqqa ulyqtaýdyń tárbıelik máni zor ekenine basa mán berdi. «Jeńis kúni – jan aıamaı elin qorǵaǵan erjúrek batyrlarymyzdy eske alý merekesi. Asaý ýaqyt tizginin aýyzdyqtaı almaısyń – jyldan-jylǵa adamzattyń basyna alapat qasiret túsirgen zulmat soǵys jaıly baıandaıtyn Uly Otan soǵysy ardagerleriniń qatary sırep barady. Ardagerlermen júzdesý óskeleń urpaqtyń elimizdiń ótken tarıhyn tereńirek zerdeleýine yqpal etip, olardyń boıynda azamattyq sana-sezim, qazaqstandyq potrıotızmdi qalyptastyrý, otansúıgishtikke, qashanda el múddesine qyzmet etýge laıyq bolýǵa tárbıelep, ardagerlerge qurmet kórsetip, alǵys sezimin bildirýge múmkindik beredi» dedi ol. Qala mektepterinen arnaıy kelgen búldirshinder qarıalarǵa gúl shoqtaryn usynyp, Jeńis kúnine arnalǵan óleńderin oqydy. Merekelik shara Ulttyq Qaýipsizdik komıteti shekara qyzmeti akademıasynyń sarbazdary, Koreı mádenı ortalyǵy, «Aıajan» medısına koleji ónerpazdarynyń, M.Lermontov atyndaǵy memlekettik akademıalyq orys drama teatry men T.Júrgenov atyndaǵy Qazaq ulttyq óner akademıasy artıseriniń oryndaýyndaǵy merekelik konsertke ulasty. Jastardy erlik rýhta tárbıeleıtin patrıottyq ánder shyrqaldy. Sondaı-aq qaıyrymdylyq is-sharaǵa demeýshilik kórsetken kásiporyndar ardagerlerge tolymdy tartý-taralǵylaryn usyndy. Qaıyrymdylyq baǵytqa den qoıǵan shara uıymdastyrýshylary mundaı júzdesýlerdi tek mereke kúnderi ǵana emes, udaıy ótkizip turýǵa nıetti ekendikterin bildirdi. Kezdesýge kelgen maıdangerler men tyl ardagerleri ózderine kórsetilgen syı-qurmetke rızashylyǵyn bildirdi. Sonymen birge, jınalǵan qonaqtar mýzeıdegi «Qazaqstan Uly Otan soǵysy jyldarynda» ekspozısıasymen keńirek tanysyp, jyldar jylnamasyna, surapyl soǵys tarıhyna bir sát úńilgendeı boldy.
