Almaty qalalyq Jumyspen qamtý jáne áleýmettik baǵdarlamalar basqarmasyna qarasty Almaly aýdandyq «Múgedekterdi beıimdeý jáne ońaltý ortalyǵynyń» mamandary «Rýhanı jańǵyrý» baǵdarlamasyn qoldaý maqsatynda, ózderiniń qamqorlyǵyndaǵy múmkindigi shekteýli jandardy tabıǵat aıasyna alyp shyǵyp, elimizdiń tarıhı jerlerin aralatty, tanystyrdy.

Jolaı qala ortalyǵyndaǵy kórikti kóshelerge aty berilgen Abylaı han, Qarasaı batyr, Naýryzbaı batyr, Qabanbaı batyr, Jambyl, A.Iassaýı syndy tulǵalardyń ómir joly, tarıhta qalǵan izderi týraly áńgimeledik.

Týǵan jerdi taný saparymyzdy Almaty irgesindegi Sarybaı bı, Qaınazar, Súıinbaı, Jambyl, Túktibaı syndy ardaqty atalarymyz jerlengen Bes ata qorymynan bastadyq.

Belgili tarıhı tulǵalardyń árqaısysynyń ómirimen jeke-jeke tanystyq. Sáýlet óneriniń sońǵy úlgilerimen turǵyzylǵan mazarlardyń basyna aıaldap, duǵa ettik.

Sarybaı 19-ǵasyrda ǵumyr keshken, elin yntymaq-birlikke uıyta bilgen abyz bı bolǵan kisi. Mazarynyń mańaıynda boı kótergen máýeli aǵashtar, ádemi gúlder kóz tartady. Túktibaı ata mavzoleıiniń de aldy tamasha. Onyń mańynda urpaqtary ómir súrip jatqanyn bildik. Urpaqtarynyń qolynda búgingi tańda atalarynyń  halyqty emdegen, dem bergen qobyzy saqtalǵan eken. Súıinbaı men Jambyl atalar rýhyna da taǵzym ettik.

Qaınazar – Sarybaı bıdiń daýyl máselelerdi sheshýde ádil de oń qoly bolǵan adam. Onyń mazaryn urpaqtary 2003 jyly turǵyzǵan eken. Almaly aýdandyq «Múgedekterdi beıimdeý jáne ońaltý ortalyǵynyń» ókilderi osy mazardyń aınalasyn kórkeıtý maqsatynda Almatydan arnaıy alyp kelgen qunarly topyraqtaryn seýip, túrli gúl otyrǵyzyp, ıgilikti is atqardy. Jasyl jelekterdi múmkindigi shekteýli jandardyń ózderi sýardy.

Qazaq jeri keń. Qushaǵy da keń. Biz týǵan jerdiń tynys-tirshiligimen tanysý arqyly, tabıǵat aıasynda da jaqsy demalyp qaıttyq.

Bul saparymyzdy alda taǵy da jalǵastyratynymyz sózsiz.