Almatydaǵy №3 Arnaýly áleýmettik qyzmetter kórsetý ortalyǵynyń  qurylǵanyna bıyl 15 jyl. Búginde bul ortalyq  jalǵyzilikti 300-den astam adamnyń turaqty baspanasyna aınalǵan. Olardyń árqaısysynyń ómir joly bir-birine uqsamaıdy, biraq bárine ortaq uqsastyq – jalǵyzdyq. Bul ortalyqta qazir 7 soǵys ardageri (segizinshisi Jeńis kúnine eki kún qalǵanda kóz jumypty), 3 ardagerdiń jesiri, 62 tyl ardageri turyp jatyr.

185 qyzmetkeri bar ortalyqta da qarttarǵa barlyq jaǵdaı jasalǵan. Bir úıge qajetti jıhazdarmen, turmystyq zattarmen jabdyqtalǵan tap-taza jeke bólmeler. Aq tósek. Ystyq sý. Teledıdar. Radıo. Tórt mezgil tamaq. Jyly uıa.

7000-ǵa jýyq kitap qory bar kitaphananyń da qarttardyń kúndelikti ómirinde erekshe orny bar. Munda qarıalar kez kelgen ýaqytta qalaǵan kitabyn oqı alady, bólmesine aparyp oqımyn dese de óz erkinde. Kompúter de, ǵalamtor da bar.

№3 Arnaýly áleýmettik qyzmetter kórsetý ortalyǵynyń turǵyndary da Jeńis kúnin merekeledi. Arnaıy shaqyrtýmen kelgen káris mádenı ortalyǵynyń «Rodına» án-bı ansambliniń músheleri soǵys aldyndaǵy beıbit ómirdi, ómirge qushtar qyz-jigitterdi, odan keıin Uly Otan soǵysynyń bastalyp, jigitterdiń maıdanǵa attanǵan sátterin, azaly saǵattardy sahnalady.

Osy ortalyqtyń turǵyny Aıymtory apa «Ana» monologyn oqyǵanda úlkender kóz jastaryn súrtip, muńaıyp-aq qaldy. Kishkentaı órender ata-ájelerine arnap «Katúsha» bıin bılep berdi. «Rodınanyń» qart ónerpazdary «Sınıı platochek», «Temnaıa noch», «Jýravlı», «Zemlá» syndy úlken-kishiniń júregine jol tapqan, áli kúnge mánin joǵaltpaǵan tarıhı ánderdi oryndady. Ortaǵa shyǵyp dóńgelene váls bılegen qarttar tamasha kóńil-kúıde boldy.

Ádemi keshti №3 Arnaýly áleýmettik qyzmetter kórsetý ortalyǵynyń dırektory Raısa Sypabekovanyń bastamasymen jýyrda ǵana qurylǵan, kostúmderi de ıneniń kózinen jańa ótken, án-jyrǵa jaqyn qarıalardyń basyn biriktirgen hordyń oryndaýyndaǵy «Katúsha», «Jeńis» ánderi túıindedi.