KADEX-tegi qaıǵyly oqıǵa týraly qorǵanys jáne aeroǵarysh ónerkásibi mınıstri Beıbit Atamqulov Májilis úzilisinde aıtty.

Mınıstrdiń sózinshe, kórme aýlasynda basyna stend qulap qaıtys bolǵan er adamǵa baılanysty tergeý jumystary jalǵasyp jatyr.

«Ol kún kelýshilerge arnalmaǵan edi. Arnaıy mamandar ǵana júrdi, olar pavılonnyń ishinde boldy. Er adam qaıǵyly oqıǵa bolǵan kúni ortalyq qaqpa arqyly kirmegen, ótý pýnktine tirkelmegen. Ne sebepti jáne qaı esik arqyly kirgeni belgisiz. Ózimiz de jaýabyn bilmeımiz», - dedi Beıbit Atamqulov.

Tergeý organdary er adamnyń aýlaǵa qalaı ótkenin anyqtap jatyr.

«Bul – kúrdeli suraq, men ázirge aıta almaıtyn máseleler bar. Sáıkes kelmeıtin qujattarmen sonda bolǵanyna ol azamattyń ózi kináli. Adamnyń basynan túrli jaǵdaılar ótedi», - dedi Beıbit Atamqulov.

Aıta keteıik, 24 mamyrda KADEH-2018 halyqaralyq kórmesinde aqparattyq stend qulaǵan kezde jaraqat alǵan er adam aýrýhanada kóz jumdy. Mınıstrliktiń málimetinshe, zardap shekken azamatqa kórmede kezekshilikte bolǵan jedel járdem brıgadasy der kezinde medısınalyq kómek bergen. 

Keıin zardap shegýshi aýrýhanaǵa jatqyzyldy. Aýrýhanaǵa apara jatqanda esin biletin, jaǵdaıy bir qalypty boldy. Alaıda medısınalyq mekemede háli kúrt nasharlap, dárigerler onyń ómirine arasha túse almady.