"Tulpar minip, tý alǵan!" Dál osyndaı ataýmen almatylyq oqýshylar arasynda 10 kún buryn batyrlar jyryn jatqa aıtýdan baıqaý bastalǵan bolatyn. Osy qysqa ǵana ýaqyt ishinde saıysta baq synaǵysy kelgen 1300-den astam bala ótinim berip úlgeripti. Iaǵnı, endi kemi 1300 oqýshy jaz boıy Alpamys batyr jyryn bastan-aıaq jattaıtyn bolady, dep jazady Qamshy.kz aqparat agenttigi.
Aıta keteıik, "Rýhanı jańǵyrý" baǵdarlamasy aıasynda ótip jatqan baıqaýdy Almaty qalasy ákimdiginiń qoldaýymen R-Media kompanıasy uıymdastyryp otyr. Joba jetekshileriniń aıtýynsha, baıqaýǵa qyzyǵýshyRýlyq tanytyp, onyń aýqymdy ótýine nıet bildirip jatqan uıymdardyń qatary arta bastapty. Solardyń biri - Ulttyq aýdarma búrosy. Atalǵan qoǵamdyq qor búginde Memleket basshysynyń "Jańa gýmanıtarlyq bilim. Qazaq tilindegi 100 jańa oqýlyq" jobasyn júzege asyryp keledi. Endi batyrlar jyrlarynyń balalar arasynda keńinen taralýyna úles qospaq nıette.
Al, almatylyq balalardyń dál bulaısha belsendilik tanytýy beker emes. Baıqaýdy jeńgen oqýshyǵa 1 500 000 teńge aqshalaı syılyq beriledi. Tıisinshe, ekinshi orynǵa - 1 000 000, úshinshi orynǵa - 500 000 myń teńge júlde taǵaıyndalǵan. Sondaı-aq, olardy jyr saıysyna daıyndaǵan ustazdary da nazardan tys qalmaq emes. Júldeli oryn alǵan árbir oqýshynyń muǵalimi Anglıanyń Oksford qalasyna baryp, til bilimin jetildiretin mektepte aǵylshyn tilin úırenip keledi.
Aıta keteıik, baıqaý Almatydaǵy orta bilim beretin barlyq mektepterdiń 6-10 synyp aralyǵynda oqıtyn oqýshylary arasynda ótedi. Jobany Almaty qalasy ákimdiginiń qoldaýymen R-Media kompanıasy uıymdastyryp otyr.
- Baıqaýdy jarıalaǵanymyzǵa sanaýly kún ótse de qatysýshylardyń sany óte kóp. Qazirgi tańda 1300-den astam oqýshy ótinim berip úlgerdi jáne bul sıfra áli de ósýi múmkin. Qatysýshylar endi 3 aı jazdyq kanıkýlynda "Alpamys batyr" jyryn basynan aıaǵyna deıin jattaýlary tıis. Qyrkúıek aıynyń basynda aýdandyq irikteý kezeńin ótkizip, aıdyń aıaǵynda qalalyq deńgeıdegi baıqaýdyń nátıjesin shyǵaramyz, - deıdi jobany uıymdastyrýshylar.
Jalpy, baıqaý 2 deńgeıden turady: aýdandyq jáne qalalyq. Aýdandyq saıysta úzdik shyqqan úsh oqýshy qalalyq baıqaýda baq synaıdy. Iaǵnı, Almatydaǵy 8 aýdannan iriktelip alynǵan 24 oqýshy júldeli oryndardy ózara sarapqa salady. Basty maqsat - balalar arasynda kitap oqýdy, onyń ishinde qazaq halqynyń batyrlyq epostaryn nasıhattaý, óskeleń urpaqtyń shyǵarmashylyq jáne zıatkerlik qabiletin damytýǵa jaǵdaı jasaý.
