Sáýir aıynda Mádenıet jáne sport vıse-mınıstri Astananyń mereıtoıyna respýblıkalyq búdjetten 18,8 mıllıard teńge bólingenin málimdegen bolatyn. Álemde daǵdarys júrip jatqan hám el ekonomıkasynda ınflásıa men valútanyń álsireýi baıqalyp jatqan búgingi tańda bir mereıtoıǵa osynshalyq qarajat bólýdi qazaqstandyqtar qup kórmeıdi. Salystyrmaly túrde aıtsaq, mektepter men emhanalardyń qurylysyna nebári 7 mlrd bólingenin. Bundaı reaksıa áleýmettik jelide qatty baıqaldy. Osyǵan oraı mınıstrler búdjetten bólingen qarjy týraly túsinikteme berdi.
Mádenıet jáne sport mınıstri Arystanbek Muhamedıuly bolsa «Qazaqstan — álemdik qaýymdastyqtyń bir bóligi. Barlyq el halyqty tartý úshin óner arqyly óz jetistikterin kórsetýi tıis. Imıjdik sharalar osy úshin uıymdastyrylady. Ózderińiz kórip otyrǵandaı, biz barlyq sharany iri álemdik teatrlarmen nemese konserttik uıymdarmen birlesip ótkizip jatyrmyz. Bul — qajet» deıdi. Ol «Elton Djon, Ledı Gagany shaqyryp, formýla-1 sharysyn ótkize almaımyz. Jalǵyz Elton Djonnyń ózine bólingen búdjettiń jartysy keter edi. Aıtylǵan synǵa kelsek, biz josparlanǵan is-sharalar tizimin erterek berýimiz kerek edi. Qarjy mınıstrligi bizdi tolyqtaı qoldady, qarajat búdjette qarastyrylǵan. Biz merekelik baǵdarlamanyń joǵary deńgeıde ótýine barlyq kúshimizdi salamyz» dep túsindiredi.
Al, Astanany Qazaqstannyń vızıttik kartochkasy dep sıpattaǵan Aqparat jáne komýnıkasıalar mınıstri Dáýren Abaev bolsa «El táýelsizdigi degende, eń aldymen elorda oıǵa oralady. Astananyń 20 jyldyǵy sheneýnikter úshin emes, qala turǵyndary men qonaqtary úshin merekelenedi. Ekinshiden, bul búdjet birneshe memlekettik organnnan quralady. Bul aqsha qazir kóbisi aıtyp júrgendeı, kredıttik aqsha emes. Tekserýshi organdar qarajattyń oryndy jumsalǵan-jumsalmaǵanyn kez kelgen ýaqytta teksere alady. Sizder únemi bar nazardy aqshaǵa aýdarasyzdar, al sol sharanyń bizge beretin mýltıplıkatıvti áserin eshkim oılamaıdy. Máselen, ınfraqurylym qalady, qala damıdy, bári de qala turǵyndary men qonaqtary úshin. Jumsalǵan aqsha salyq, túrli shara túrinde el qazynasyna qaıtyp oralady», — dep túsindiredi búdjet qarjysyn.
Eske salsaq, 2015 jyly aqpanda prezıdent Nazarbaev «Búdjet qarjysy esebinen mereıtoı jasaýdan tyıylý kerek». – degen bolatyn. «Bizde mereıtoı jalpyǵa ortaq súıikti is bolyp otyr. Mereıtoı qaıda bolsa, bári sonda. Jıyndarǵa qatysý, banketterde otyrý, osylaı jalǵasa beredi. Álemniń qaı jerinde biz sıaqty mereıtoı ótkizedi? Uly datalardy atap ótip, baspasózde, telearnalarda, ǵylymı-tájirıbelik konferensıalarda aıtý kerek. Al dúrkiretip toı uıymdastyrý, aıdalada myńdaǵan qazaq úı tigý mereıtoı ıesine ne bererin aıtyńdarshy maǵan?», - degen edi Elbasy.
Bir aıta keterligi, Astana kúnin toılaýǵa ketetin búdjet shyǵyny jyl saıyn qarqyndy ulǵaıyp keledi. Máselen, 2009 jyly nebári 120 mıllıon teńge jumsalsa, 2014 jyly 700 mıllıonǵa ósken. Al bıyl rekordtyq kórsetkishke jetti. Al qyrýar qarjyǵa qaryq bolatyn mınıstrlik ókilderi sharalar aptalyq emes, jyl boıy jalǵasady deıdi.
