Qabanbaı batyr aýylyndaǵy týrısik mýzeı kesheni jeltoqsan aıynda paıdalanýǵa beriledi. Bul týraly Úrjar aýdanyna jasaǵan sapary barysynda oblys ákimi Danıal Ahmetov málimdedi.

Esterińizge salaıyq, byltyr atalmysh eldi mekenge jasaǵan sapary barysynda aımaq basshysy kóp jyl boıy qańyrap bos turǵan aýyldyq Mádenıet úıin mýzeıge aınaldyrý kerektigin aıtyp,  quzyrly mekemelerge tıisti tapsyrma bergen bolatyn.

Búginde atalmysh nysandy jóndeý jumystary bastalyp ketken.

Aýmaǵy 300 sharshy metr aýmaqty alyp jatqan nysanda bolashaqta baǵzy zamannan bergi qazaq tarıhynyń qundy jádigerleri meken tabatyn bolady. Bir ǵana Altyn adam eskertkishin satyp alýǵa 20 mıllıon teńge qarajat bólinipti. Jalpy, nysandy qalpyna keltirý jumystaryna 164 mıllıon teńge qarastyrylǵan. Degenmen oblys ákimi mýzeıdiń qoryn áli de tolyqtyrý qajet ekenin eskertti.

— Eksponataryńyz az eken. Áli de tolyqtyrý qajet. Sebebi, irgedegi Alakólge jerlesterimiz ǵana emes, búkil respýblıkadan, tipten shetelden qonaqtar kelip, mýzeıge de at basyn tireıtin bolady. Sondyqtan qonaqtarǵa kórseter dúnıelerimiz barynsha kóp bolýy kerek,  — dedi oblys ákimi.

Aımaq basshysy, sonymen qatar eger merdiger kompanıa qurylys jumystaryn keshiktirmeıtin bolsa, bul maqsatqa onda oblystyq búdjetten qosymsha 250 mıllıon teńge bólinetinin jetkizdi.