Qýyrshaq teatry – balalarǵa óner deıtin ózgeshe ólkeniń bar ekenin bildirip, teatr týraly túsiniginiń qalyptasýyna yqpaly erekshe. Jansyz qýyrshaqqa jan bitirip, is-qımyl arqyly kórermenin baýlap alatyn ónerdiń bul túri Semeı qalasyndaǵy fızıka –matematıka baǵytyndaǵy Nazarbaev Zıatkerlik mektebiniń jataqhana tárbıelenýshileri arasynda keń qanat jaıyp keledi. Qýyrshaq teatry qurylmas buryn arnaıy kıimder tigilip, qoıylatyn spektáklder anyqtaldy.

Teatrdyń basty ereksheligi- sahnalyq qoıylymdardyń deni aǵylshyn tilinde qoıylady. Osy arqyly oqýshylardyń til baılyǵyn damytýdy kózdegen óner ujymy az ýaqyttyń ishinde óz kórermenderin taýyp úlgerdi. Negizinen 7 synyp oqýshylarynan quralǵan teatr jýyrda serıalyq «Aldar Kóseniń kóńildi oqıǵalary» atty qoıylymymen qalamyzdaǵy № 7 «Aqbota» ıaslı –baqshasyna baryp, kishkentaı balaqaılardy qýantyp qaıtty. Jas ártister qatary artyp kele jatqan óner ujymynyń saparyn búldirshinder men bala-baqsha ujymy jaqsy qabyldady.

Az ýaqyt ishinde úlken qoldaýǵa ıe bolǵan qýyrshaq teatry endi úlken maqsat qoıyp, kelesi kezeńdi baǵyndyrýdy kózdep otyr.