Semeıde QR Prezıdentiniń júldesine arnalǵan «Qazaqstan barysy-2018» respýblıkalyq týrnırine irikteý jarys ótkizildi. Oblystyq saıysqa Shyǵys Qazaqstannyń barlyq óńirlerinen kil myqty palýandar jınaldy.

Atap aıtqanda irikteý básekesinde aımaqtyń 20-dan asa úzdik sańlaqtary kúsh synasypty. Olardyń arasynda respýblıkalyq jáne halyqaralyq jarystarda olja salyp júrgen sportshylar da boldy.

Absolútti salmaqta órbigen beldesýler tartysty ótti. Áıtse de bıylǵy saıystada Aıbek Nuǵymarovqa teń keler jan tabylǵan joq. Shyǵystyń shymyr uly bul jolyda erledi. Aqtyq synda ol Barqytbeldiń sańlaǵy Maqsat Mázibaevtan aılasyn asyrdy. Al úshinshi orynǵa taǵy bir saqa palýan abaılyq Erlan Konkıev turaqtady. Osylaısha «Shyǵys barysy-2018» týrnırinde top jarǵan Aıbek, bıylǵy «Qazaqstan barysy» jobasynda óńir namysyn qorǵamaq.

Aıta keteıik, shyǵysqazaqstandyq sheber buǵan deıin «Qazaqstan barysy» jáne «Álem barysy» syndy dodalarda jeńimpaz atanǵan edi. Sol sekildi jerlesimiz álem jáne Azıa birinshilikterinde altyn tuǵyrǵa birneshe márte kóterildi. Bul oraıda ol Qazaqstannyń eńbek sińirgen sport sheberi ekenin aıta ketken oryndy.