Ońtústikte 17-29 mamyr kúnderi aýdan, qalalarda bastaý alǵan «MEN QAZAQPYN» mega-jobasynyń oblystyq irikteý kezeńi aıaqtaldy. Sh.Qaldaıaqov atyndaǵy   fılarmonıada  ótken dúbirli dodada  ár aýdannan úzdik shyqqan 73 ónerpaz qatysty. Olar terme, kúı, dástúrli án janry boıynsha ónerlerin ortaǵa  saldy. 

Qazylar quramynda jazýshy Marhabat Baıǵut, «Ońtústik» telearnasynyń dırektory   Baýyrjan   Berdimuratov,  kúıshi-kompozıtor Nursat Beıseqojaev, ánshi-termeshi Jaqyp Spataev syndy tanymal óner tarlandary tórelik jasady. Ádilqazy músheleri ónerpazdardyń kásibıligine, biliktiligine, júris-turysy men kıim úlgisine de asa mán berdi.

Baıqaý qorytyndysy boıynsha Ońtústikten myńnan tulpar, júzden júırik bolyp úsh ónerpaz iriktelip, halyqaralyq mega-jobada óńirdiń namysyn qorǵaıtyn boldy. Olardyń qatarynda sozaqtyq Orazáli Jańabaev dástúrli án óneri boıynsha ózgelerden oza shapsa, terme janry boıynsha otyrarlyq Rýslan Ahımbekovtyń baby men baǵy qatar shapty. Al Maqtaral aýdanynyń týmasy Shyńǵys Isaev kúı janry boıynsha ónersúıer qaýymnyń qoshemetine bólendi.

Oblystan iriktelip shyqqan úsh ónerpaz aldaǵy ýaqytta «QAZAQSTAN» telearnasyndaǵy «MEN QAZAQPYN» jobasynda 3 mıllıonǵa jýyq Ońtústik óńiriniń namysyn qorǵaıtyn bolady.  Respýblıkalyq aınalymda jeńiske jetken jeńimpazdar "Jyldyń eń úzdik dástúrli ánshisi", "Jyldyń eń úzdik termeshisi" jáne "Jyldyń eń úzdik kúıshisi" atalymdary boıynsha marapattalady.