Búgin Ońtústik Qazaqstan memlekettik pedagogıkalyq ýnıversıtetinde oblys ákimi Janseıit Túımebaev stýdent jastarmen kezdesti. Basqosýda aımaq basshysy bolashaq maman ıelerine «Rýhanı jańǵyrý: jastar jáne tarıhı taǵylym» taqyrybynda leksıa oqydy. Sharaǵa joǵary oqý ornynyń oqytýshylary men jas ǵalymdar, stýdent jastar jáne BAQ ókilderi, jalpy sany 400-ge jýyq adam qatysty.
Elbasynyń «Rýhanı jańǵyrý» baǵdarlamalyq maqalasyn túsindirip, jastarmen pikir almasýǵa arnalǵan kezdesýde oblys ákimi qoǵamdyq sanany jan-jaqty jáne túbegeıli jańǵyrtýǵa baǵyttalǵan ulttyq jobanyń usynylýy -el damýynyń tarıhı kezeńine saı mańyzdy sheshim bolǵandyǵyn atap ótti.
«Memleket basshysy: «Sanamyz isimizden ozyp júrýi, ıaǵnı odan buryn jańǵyryp otyrýy tıis», - dep naqty mindet qoıdy. Prezıdent qazaqstandyq jastardyń tárbıesine únemi nazar aýdaryp keledi. Onyń aıǵaǵy «Rýhanı jańǵyrý» baǵdarlamasyndaǵy eń mańyzdy mindetterdiń biri adamı kapıtal sapasyn jaqsartýǵa basymdyq bergendigi. Eń birinshi árbir azamat óz tilin bilýi qajet. Sondaı-aq, Elbasy rýhanı jańǵyrýdaǵy ulttyq sana-sezim kókjıegin keńeıtýde eki nárseniń basyn naqty ashyp berip otyr. Onyń biri – ulttyq kod, ulttyq mádenıet saqtalmasa, eshqandaı jańǵyrýdyń bolmaıtyndyǵy. Ekinshisi – alǵa basý úshin ulttyń damýyna kedergi bolatyn ótkenniń kertartpa tustarynan bas tartý. Mundaǵy basty ıdeıa – bolashaq pen ótkendi úılesimdi sabaqtastyra bilý. Ozyǵyn alyp, tozyǵyn tastaý», - dedi Janseıit Qanseıituly.
Basqosý barysynda stýdent jastar oblys basshysyna tolǵandyrǵan saýaldaryn qoıyp, jaýap aldy. Atap aıtqanda, Sıfrly Qazaqstan, Latyn álipbıine kóshý syndy ózekti taqyryptar kóterildi. Budan bólek, aımaq basshysy Janseıit Qanseıituly Qazaq dıplomatıasynyń jetistigi men Túrkologıa ǵylymynyń jarqyn bolashaǵy taqyrybynda sóz qozǵady. Ulttyq baǵdarlamanyń mańyzdy tustaryna toqtaldy.
«Alash kósemi Álıhan Bókeıhan: «Ozǵandarǵa jetý kerek, jetkenderimizden ozý kerek. Dúnıeniń tórine tyrmysqandar, tórden oryn alyp jatyr. Tyryspaǵandar esikte qalyp jatyr: ecikte qalmaı, birge tyrmysalyq», - degen. Demek, «Rýhanı jańǵyrý» baǵdarlamasy - aýqymy asa keń jáne júıeli túrde, tynymsyz jumys isteýdi, asa joǵary jaýapkershilikti talap etedi», - dep qorytyndylady oblys ákimi.
Igi shara sońynda Janseıit Qanseıitulyna Ońtústik Qazaqstan memlekettik pedagogıkalyq ýnıversıtetiniń rektory Ońalbaı Aıashev JOO-nyń profesory ataǵyn tabystap, atalǵan shańyraqtyń «Aqbaıan» sán ortalyǵy arnaıy daıyndaǵan mantıany kıgizdi.
