Búgin aqyn, Nursultan Nazarbaevqa poema arnaǵan, prezıdenttiń qolynan alǵys hat alǵan Ertaı Sultanbektiń Qytaıda iz-tússiz joǵalyp ketýine qatysty baspasóz máslıhaty ótti. Oǵan aqynnyń qaryndasy Nurgúl Sultanbek, aǵasy Jeńisbek Sultanbek jáne belsendi Serikjan Bilásh qytysty, dep habarlaıdy Qamshy.kz aqparat agenttigi.
Ertaı Sultanbektiń jaqyndary ony 2018 jyldyń 25 mamyrda Qytaı polıseıeri ustap ketti degen oıda. Sebebi dál sol kúni Ertaı Sultanbek inisine WeShat arqyly hat joldaǵan. Onda máseleni Elbasyǵa jetkizýin surap, qujatynyń nómirin qosa jibergen.
«Dúken aǵa, múmkindik bolsa, elbasyna jetkizińiz. Juńgo men qazaq eliniń uly dostyǵy turǵanda meniń elbasynan alǵys hat alǵanym kiná má?» dep jazylǵan habarlamada.
İnisi qaıta habarlasqanda telefony sóndirilý bolǵan. Sodan beri onyń qaıda ekeni belgisiz. 51 jastaǵy aqynnyń áıeli men balalary týraly da eshqandaı aqparat joq. Qazaqstanǵa kóship kelgen, Qazaqstannyń azamattyǵyn alǵan jaqyndary Qytaıda qalǵan týystarynan Ertaı Sultanbek týraly aqparat suraǵan, alaıda eshqandaı málimet bile almaǵan. Aǵasy men qaryndasynyń aıtýynsha, Qytaıdaǵy jaqyndary aqyn týraly aqparat berýge qorqyp otyr.
Ertaı Sultanbektiń aǵasy men qaryndasynyń oıynsha, ony Nazarbaevqa arnap poema jazǵany úshin ustaǵan. «Nur-aǵanyń monology» poemasy 2008 jyly 30 tamyzda «İle» gazetinde qazaq jáne qytaı tilinde jaryq kórgen.
Jeńisbek Sultanbek pen Nurgúl Sultanbek Qazaqstan bıliginen aqyndy bosatýǵa kómek surady.
Aqynnyń týystarynyń aıtýynsha, Ertaı Sultanbek Qazaqstan azamattyǵyn almaǵan. 2001 jyldan beri Qazaqstanǵa kelip, ketip júrgen.
Belsendi Serikjan Biláshtiń aıtýynsha, Qytaı túrmeleriniń 4 túri bar. Birishisi - "Qaıta tárbıeleý" ortalyǵy dep atalady. Ekinshi túri - "Jabaıy ımamdary tárbıeleý" ortalyǵy. Úshinshisi - kásibı bilikti arttyrý ortalyǵy. Tórtinshisi - "Jyly júrek. Meırim. Mahabbat" ortalyǵy. Aty basqa bolǵanymen zaty - túrme.
"Saıası úırený ortalyǵyndaǵy adamdardy jaqyndarymen kezdestirmeıdi. Qytaıdyń saıası úırený ortalyǵynda otyrǵan azamattardyń aıtýynsha, ol túrmeden de beter. Adam zat tarıhyndaǵy sumdyq jer. Túrmege otyryp shyqqandardyń ózi saıası úırený ortalyǵy túrmeden asyp túsetinin aıtty", - deıdi Serikjan Bilásh.
Ásem Álmuhanbet
