Qytaıdyń Sındao qalasynda ótip jatqan SHYU samıti barysynda Elbasy Nursultan Nazarbaev uıymnyń strategıalyq basymdyqtaryn atady, dep habarlaıdy Qamshy.kz aqparat agenttiginiń tilshisi.
"Búgingi jıynnyń nátıjesinde Pákisten men Úndistannyń qosylýymen segizdik formattaǵy uıym jumysynyń ary qaraı damıtynyna senimdimin. Qurmetti áriptister, bizdiń yntymaqtastyǵymyzdyń kelesi aspektilerine toqtalyp ótsem deımin: birinshiden, SHYU-nyń strategıalyq basymdylyǵy saıası dıalogty nyǵaıtyp, uıymǵa múshe elderdiń qaýipsizdigin qamtamasyz etý men damýyn jalǵastyrý bolyp qalýy tıis. Osyǵan baılanysty biz SHYU-ǵa múshe memleketterdiń uzaqmerzimdi yntymaqtastyǵy men tatýlyǵy týraly kelisimimizdi júıeli túrde júzege asyra beremiz", - dedi Elbasy samıtte.
Nazarbaevtyń aıtýy boıynsha bul qujat seriktestiktiń kózdegen maqsattarǵa jeteleıtin negizgi baǵyty sanalady.
"Búgin qol qoıylyp jatqan 2018-2022 jyldarǵa arnalǵan jumys jospary uıymnyń osy joldaǵy jol kartasyna aınalady. Ekinshiden, uıymǵa múshe elderdiń úsh mıllıard adamy bar keńisitigin SHYU-nyń negizgi ekonomıkalyq yntymaqtastyqty jandandyratyn negizgi qýat kúshi retinde paıdalanýymyz kerek", - dedi Nazarbaev.
Aıta keteıik, Sındao samıti segizdik formatta alǵash ret ótip jatyr. Otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Qyrǵyz Prezıdenti Sooronbaı Jeenbekov, Pákistan Prezıdenti Mamnýn Hýseın, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Úndistan Premer-Mınıstri Narendra Modı, SHYU-ǵy baıqaýshy mártebesi bar Aýǵanstan Prezıdenti Ashraf Ǵanı, Belarýs Prezıdenti Aleksandr Lýkashenko, Iran Prezıdenti Hasan Roýhanı jáne Mońǵolıa prezıdenti Haltmaagıın Battýla jáne birqatar halyqaralyq uıymnyń basshylary qatysty.
Jıyn qorytyndysyna sáıkes, Shanhaı Yntymaqtastyq uıymynyń kelesi tóraǵasy Qyrǵyzstan boldy. Shı jın pıń Qyrǵyz Respýblıkasynyń uıymǵa tóraǵalyǵyna qoldaý kórsetetinin málimdedi.
Keńeıtilgen quramdaǵy otyrystan keıin samıttiń basty qujaty Sındao deklarasıasy qabyldanyp, 20-dan astam qujatqa qol qoıylmaq. Onyń 17-sin Memleket basshylary rásimdeıdi.
