SHYU-ǵa múshe elder ózara saýda jasaýdy ulttyq valútalarda júzege asyrý kerek, sebebi bul memleketter arasyndaǵy ekonomıkalyq qaýipsizdiktiń deńgeıin kóteredi dep málimdedi QR Prezıdenti Nursultan Nazarbaev. Bul týraly Qamshy.kz aqparat agenttiginiń tilshisi habarlaıdy.
"Qazir álem valútalarynyń qorjynyn ártaraptandyrý, valútanyń táýeldiligi men krıptovalútanyń paıda bolý qaýpin azaıtý týraly kóp talqylanady. Osyǵan baılanysty biz SHYU-ǵa múshe barlyq eldiń óz ulttyq valútalarynda saýda jasaýyn memleketter arasyndaǵy ekonomıkanyń qaýipsizdik aspektileriniń biri retinde qarastyrýǵa tıispiz", - dedi N.Nazarbaev Shanhaı yntymaqtastyq uıymyna múshe memleketter basshylary keńesiniń 18-shi otyrysynda.
Nazarbaevtyń sózinshe, qaýymdastyqqa múshe elderdiń ortalyq bankteri tıisti jol kartalaryn ázirleýdi bastaýy tıis.
«Bizdiń elder arasyndaǵy saýda-ınvestısıalyq jobalardy ekijaqty deńgeıden kópjaqty deńgeıge kóterý mańyzdy. Biz jobalardy qarjylandyrýǵa jáne uıymnyń sheńberinde tehnologıalyq resýrstardy jumyldyrýǵa baǵyttalǵan birlesken tetikter qurýdy qoldaımyz», - dedi prezıdent.
Aıta keteıik, Sındao samıti segizdik formatta alǵash ret ótip jatyr. Otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Qyrǵyz Prezıdenti Sooronbaı Jeenbekov, Pákistan Prezıdenti Mamnýn Hýseın, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Úndistan Premer-Mınıstri Narendra Modı, SHYU-ǵy baıqaýshy mártebesi bar Aýǵanstan Prezıdenti Ashraf Ǵanı, Belarýs Prezıdenti Aleksandr Lýkashenko, Iran Prezıdenti Hasan Roýhanı jáne Mońǵolıa prezıdenti Haltmaagıın Battýla jáne birqatar halyqaralyq uıymnyń basshylary qatysty.
Keńeıtilgen quramdaǵy otyrystan keıin samıttiń basty qujaty Sındao deklarasıasy qabyldanyp, 20-dan astam qujatqa qol qoıylmaq. Onyń 17-sin Memleket basshylary rásimdeıdi.
Shanhaı yntymaqtastyq uıymy 2001 jyly Qazaqstan, Qyrǵyzstan, Qytaı, Reseı men Tájikstan basshylary Shekara aımaǵyndaǵy áskerı saladaǵy senim sharalaryn nyǵaıtý týraly kelisim men Shekara aımaǵyndaǵy áskerı kúshterdi ózara qysqartý týralyk elisimge qol qoıǵannan keıin qalyptasqan «Shanhaı bestigi» tetiginiń negizinde quryldy.
