Astananyń 20 jyldyǵyna arnalǵan is-sharalarǵa otandyq ánshilerdi kóbirek qatystyrý kerek. Bul týraly Senat tóraǵasy Qasym-Jomart Toqaev Tvıtterdegi paraqshasynda habarlady.
"Elordamyzdyń 20 jyldyǵyna arnalǵan is-sharalarǵa shetel ártisterinen góri, otandyq oryndaýshylardy kóbirek qatystyrý qajet", - dep jazdy Senat tóraǵasy.
2017 jyly qyrkúıek aıynda memleket basshysy Astana qalasynyń 20 jyldyǵyn merekeleýdi tapsyrǵan bolatyn.
Qala kúnine daıyndyqtyń úsh baǵytta júrip jatyr. Birinshisi sharaǵa Mádenıet jáne sport mınıstrligi, ózge de áriptestermen birlesken daıyndyq. Ekinshisi - Qazaqstan óńirlerimen ózara is-qımyl. Úshinshisi - sheteldik seriktesterdiń qatysýymen ótetin sharalar. Birinshi toptama boıynsha 600-den astam sharany qamtıtyn, jyl boıy ótetin iskerlik, mádenı, sporttyq baǵdarlamalar jınaqtalǵan. Ony túrli mınıstrlikter, federasıalar, teatrlar jáne basqalary ótkizedi.
Astananyń 20 jyldyq mereıtoıyn toılaý úshin respýblıkalyq búdjetten 18,8 mıllıard teńge bólý kózdelgen. Bul týraly mádenıet jáne sport vıse-mınıstri Sáken Musaıbekov málimdedi.
20 jyldyqty toılaý aıasynda ótkiziletin 85 sharaǵa barlyǵy 18 mıllıard 800 mıllıon teńge qarastyrylǵan. Vıse-mınıstrdiń aıtýynsha, qarjy mınıstrligi bul sheshimdi qoldaǵan jáne bul qarajat búdjette josparlandy.
Al 29 mamyrda Astana ákimdiginiń Mádenıet jáne sport basqarmasynyń muryndyq bolýymen, «Qazaq eli» monýmenti aldynda, Astanamyzdyń 20 jyldyq memlekettik merekesine arnalǵan eń alǵashqy shara - Open Air konserti ótti. Deni Reseı estrada juldyzdary qatysqan konserttiń aty «Uly dala birligi» dep atalypty. Reseıden Dıma Bılan, Iýlıana Karaýlova, Sergeı Lazarev, Anna Sedokova, Natan, Anna Semenovıch, Djıgan, Elena Temnıkova, Tımýr Rodrıgez, Maks Barskıh, Mısha Marvın, «Gradýsy» toby, Artik&Asti jáne basqalary, al óz elimizden Qaırat Nurtas, Aıqyn, Mádına Sádýaqasova, Kámshat Joldybaeva, Álisher Kárimov, Erke Esmahan, Rınat Malsagov, Ringo jáne Ninety One toby óner kórsetti. Alaıda otandyq ánshilerden góri sheteldik ónerpazdardyń óner kórsetýine qala turǵyndary da, qoǵam belsendileri de "aqshanyń jelge ushyp jatqanyna" narazy boldy.
