Búgin Shymkent qalasynda Astananyń 20 jyldyǵyna oraı jańa formattaǵy jumyspen qamtý ortalyǵy ashyldy. Qala turǵyndary úshin paıdalanýǵa berilgen ortalyq Memleket basshysynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýy sheńberinde júzege asyp otyr. Aıta keterligi, onda «Jumyspen qamtý jáne áleýmettik qyzmet túrlerin bir tereze qaǵıdasy» boıynsha qyzmet kórsetý úshin birneshe mekeme toptastyrylǵan. Atap aıtqanda, Halyqty jumyspen qamtý ortalyǵy, Shymkent qalasynyń jumyspen qamtý jáne áleýmettik baǵdarlamalar bólimi men kásipkerlik bólimi, sondaı-aq Azamattarǵa arnalǵan úkimet Memlekettik korporasıasy OQO boıynsha fılıaly jumys isteýde.
Ortalyqtyń jumysymen tanysýǵa barǵan oblys ákimi Janseıit Túımebaev azamattarǵa sıfrlyq formatta kórsetilip jatqan qyzmet túrlerine qanyq boldy. Ondaǵy qala turǵyndarymen tildesken aımaq basshysy Janseıit Qanseıituly atalǵan baǵyttaǵy jumystardy taǵy da jandandyryp, xalyqtyń kóńilinen shyǵatyndaı etip qyzmet kórsetýdi tapsyrdy.
Aıta keterligi, atalǵan ortalyqtyń ereksheligi - «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» sheńberinde Shymkent qalasynyń jumyssyz jáne az qamtamasyz etilgen otbasylar, jazasyn ótegen adamdar men eńbekke qabileti tómen múmkindigi shekteýli jandardy turaqty jumyspen qamtý maqsatynda áleýmettik qoldaýǵa baǵyttalǵan.
Búginde Halyqty jumyspen qamtý ortalyǵy tolyǵymen sıfrlyq formatta jumys isteýde. Atap aıtqanda, Elektrondy anyqtama, Óz-ózine qyzmet kórsetý aımaǵy, Call center jáne Sıfrly kabınet qyzmetteri bar.
Qazirgi tańda 2018 jyldyń jyldyq josparyna sáıkes qala halqynyń 3000-nan astam azamaty turaqty jumyspen qamtylsa, 1154 jas túlek jastar praktıkasyna joldama alǵan. Qoǵamdyq jumyspen 900-ge jýyq azamat qamtamasyz etilip otyr.
