«Áleýmettik medısınalyq saqtandyrý qory» KEAQ 2018 jyl basynan beri eldegi medısına uıymdaryna halyqqa kórsetilgen qyzmetter úshin 325,2 mlrd teńgeden astam qarjy tóledi. Bul memlekettik tapsyrys sheńberinde kómek kórsetý týraly medısına uıymdarymen bekitilgen kelisimsharttardyń 47 paıyzy. Qazirgi tańda, Almaty qalasynda da emdeý mekemelerin qarjylandyrý máselesi kestege sáıkes júrgizilip jatyr. Bul týraly MSQ Almaty fılıaly dırektory Tileýhan Ábildaev málimdedi.
Aıtýynsha, fılıalmen kelisimshart bekitken medısına uıymdarynyń deregine súıensek, aımaqtaǵy emhanalar men aýrýhanalardyń qyzmetkerleri bıylǵy jyldyń qańtar, aqpan, naýryz jáne sáýir, mamyr aılary úshin jalaqyny tolyq aldy.
Fılıal basshysynyń aıtýyna qaraǵanda, 2018 jyly Almaty qalasynda memlekettik tapsyrys negizinde halyqqa tegin qyzmet kórsetýge nıet bildirgen 171 medısına mekemesimen kelisimshart bekitilgen. Onyń 103-i – jeke menshik klınıkalar. Kelisimsharttar alǵashqy medısınalyq-sanıtarlyq kómek, jedel járdem jáne basqa da basym baǵyttar boıynsha bekitilgen. Jalpy, 2018 jyly Almaty qalasy boıynsha emdeý mekemelerinen tegin medısınalyq kómek sheńberinde 94,7 mlrd teńgeniń qyzmetin satyp alý josparlanyp otyr. Maýsymnyń 7-sine deıin ońtústik astanalyq jetkizýshi kompanıalarǵa avans retinde 41,6 mlrd teńge tólendi. Bul jalpy tólenetin qarjynyń 49 paıyzy dedi T.Ábildaev.
«Jumys keste boıynsha júrip jatyr jáne ol halyqqa kórsetilgen medısınalyq kómek sapasyn baqylaýdyń jańa talaptaryna sáıkes júrgiziledi. Bólingen qarajat emdeý mekemeleriniń operasıalyq shyǵyndaryn jabýǵa, atap aıtqanda, medısına qyzmetkerlerine jalaqy tóleýge jetkilikti», - dep atap ótti ol.
Mamannyń sózine súıensek, fılıal sarapshylary halyqqa kórsetilip jatqan qyzmet sapasyn qamtamasyz etý jáne pasıentter quqyǵyn qorǵaý maqsatynda turaqty túrde monıtorıń júrgizip otyrady. Sonymen qatar, ol halyqtyń erekshe suranysyna ıe bolyp otyrǵan medısınalyq qyzmet túrlerin anyqtaýǵa da múmkindik beredi.
