2018 jyldyń 6 maýsymynda Almaty qalasyndaǵy Jazýshylar kitaphanasynda Elordanyń 20 jyldyǵyna oraı «Astana – táýelsiz Qazaqstannyń sımvoly» atty dóńgelek ústel ótti. Basqosýǵa muryndyq bolǵan «El-shejire» qoǵamdyq qory men Almaty qalasy İshki saıasat basqarmasy. İs-sharanyń basty maqsaty – Astananyń Qazaqstannyń damýyna qosqan úlesin jáne atqarylǵan aýqymdy isterin baıandaý. Elordanyń qalyptasý tarıhyna baǵa berý.
Jas qalanyń eki on jyldyq mereıtoıyna oraı uıymdastyrylǵan jıynǵa QR Ulttyq memlekettik Kitap palatasynyń dırektory Álibek Asqarov, Qazaqstannyń eńbek sińirgen qaıratkeri Asyly Osman, jýrnalıs, jazýshy Qanat Ábilqaıyr, Qaıym Muhamedhanov atyndaǵy Bilim jáne mádenıet ortalyǵy qoǵamdyq qorynyń dırektory Dına Muhamedhan syndy birqatar qoǵam qaıratkerleri, ÚEU jáne BAQ ókilderi qatysty.
Atalmysh shara Jazýshylar kitaphanasynyń meńgerýshisi Elena Aǵaısa hanymnyń alǵy sózimen bastalyp, «El-shejire» qoǵamdyq qorynyń tóraǵasy Dáýlet Áshimhannyń kirispe sózimen jalǵasyn tapty. Sondaı-aq, Álibek Asqarov Elordanyń keshegi men búginin salystyryp, árqıly esteligin ázilmen áńgimelep berdi. Astanany Arqaǵa kóshirgeni durys bolǵandyǵyn tilge tıek etti. Ol «Astana nebári 20 jylda jańa qalaǵa aınalyp úlgerdi. Buryn shet elderge tań qalyp qarasaq, búginde solarmen teńesip, ıyq tirese aldyq. Kún sanap damyǵan qalamyz áli talaı alyp qalanyń aldyn oraıtynyna kámil senemin» – dep sózin túıindedi.
Qoǵam qaıratkeri Asyly Osman «Elbasynyń bastamasyna, tapqyrlyǵyna, tabandylyǵyna eshkim kúmándanǵan emes. Ol Astanany kóshirý barysynda ótkendi eskerip, búginin oılap, bolashaqqa baıandy jospar jasady. Túsinigi mol, sanalylar bir aýyzdan qoldady. Kúdikten úmit basym bolyp, senim aqtaldy. Mine búginde gúldengen, ekonomıkasy qýatty megapolıs atandy» – dedi.
Dóńgelek ústel barysynda stýdentter is-sharaǵa qatysýshylarǵa Astana qalasynyń tarıhy týraly suraqtar qoıyp, tushymdy jaýaptar aldy. Buǵan qosa, kelgen qonaqtar kitaphanaǵa estelik kitaptaryn syılady. Jıyndy aqyn, jyraý Altynbek Ibragımov óziniń «Astanaǵa arnaý» jyrymen qorytyndylady.
