Qurmanǵazy atyndaǵy ulttyq konservatorıanyń tóńiregindegi daýdyń dabyrasy basylmaı tur. Sebebi memlekettik aýdıttiń tekserý aktileri boıynsha aqyly qyzmetter men stıpendıalardan 200 mln teńgeden astam qarjy qoldy bolǵan. Oqý ornynyń rektory, belgili pıanınoshy Jánıa Áýbákirovanyń jemqorlyqqa tikeleı qatysy bar deıdi áriptesi.

Bıyl 24 mamyrda Mádenıet mınıstrligi konservatorıada júrgizgen tekseris nátıjesin Almatydaǵy quqyq qorǵaý organdaryna tapsyrdy.

Jaqynda konservatorıanyń qarjy jáne ekonomıkalyq máseleler jónindegi prorektory Botakóz Kópbaevanyń málimdemesi jelide qyzý talqyǵa tústi. Ol oqý ornyndaǵy zańsyz áreketterdi áshkerelep, rektory Jánıa Áýbákirovaǵa birqatar aıyp taqqan. Al Jánıa Áýbákirova prorektordyń sózin japqan jala, jaqqan kúıe dep, at-tonyn ala qashyp otyr.

Botakóz Kópbaeva qarjy jáne ekonomıkalyq máseleler jónindegi prorektor laýazymyna 2017 jyldyń 2 mamyrynda Jánıa Áýbákirovanyń shaqyrtýymen taǵaıyndalǵan. «Vremá» gazetine bergen suhbatynda ol jumysqa kelgen kúnnen bastap túsiniksiz jaǵdaıǵa tap bolǵanyn aıtady.

Botakóz Kópbaeva konservatorıaǵa qujat júzinde jumysqa qabyldanǵan, biraq is júzinde múlde qyzmet atqarmaıtyn ondaǵan adamnyń esimin tapqan. Bas býhgalter jumystan ketken soń «1S» baǵdarlamasyna kirip, keıbir qyzmetkerlerdiń esepshotyna aı saıyn jalaqydan bólek qomaqty qarajat túsip otyrǵanyn ańǵarady. Ózge esepshilerden máseleniń mán-jaıyn surastyrǵanda, olar aqshany kartadan alǵan soń bas býhgalter Jumaǵulovaǵa berip otyrǵandaryn moıyndapty. Tipti, rektor Jánıa Áýbákirovanyń kómekshisiniń shotyna da túsiniksiz aqsha aýdarymdary jasalǵan.

Prorektor osylaısha bank kartalary arqyly 77 mıllıon teńge qarajattyń qumǵa sińgen sýdaı joǵalyp ketkenin anyqtaǵan. Mundaı jaǵdaı sońǵy úsh jylda turaqty qaıtalanǵan. Býhgalterlik eseptegi qateler, aqyly qyzmetten túsken qarajattyń bóten esepshottarǵa túsýi, mamandardyń jumystan túsiniksiz sebeptermen bosatylýy, eń soraqysy, konservatorıadaǵy bylyqtardyń beti ashyla bergende Botakóz Kópbaevanyń soqqyǵa jyǵylyp, aýrýhanaǵa túsýi jaǵdaıdy ýshyqtyryp jibergen.

Botakóz Kópbaeva ózine jasalǵan qastandyqqa Jánıa Áýbákirovany kinálaıdy. Alaıda Jánıa Áýbákirova qolastyndaǵy mamannyń soqqyǵa jyǵylǵanyn sol kúni-aq qarjy mınıstri Baqyt Sultanovqa habarlap, munyń konservatorıadaǵy qujattarmen baılanysty bolýy múmkin ekenin eskertipti.

25 mamyrda rektor uzaq únsizdikten keıin Botakóz Kópbaevanyń ózine taqqan aıyptaryna áleýmettik jelide jaýap berdi. Aıtýynsha, Kópbaeva  2017 jyldyń maýsym aıynyń aıaǵynda bas býhgalterdiń jumysynan zań buzýshylyqtardy baıqaǵan.

«Kópbaeva júrgizgen tekseristiń barlyǵyn ózim baqylap otyrmyn. İİD-ge, İİM-ge onyń soqqyǵa jyǵylǵanyn men habarladym. Burynǵy bas býhgalterdiń jumysynan tabylǵan olqylyqtardy túzetý úshin táýelsiz aýdıtorlyq kompanıalar men memlekettik mekemelerge de ózim habarlasqan bolatynmyn», - dep jazdy Áýbákirova.

Rektordyń sózinshe, Kópbaeva jumys barysynda áriptesterimen til tabysa almaǵan. Al qyzmet babymen Astanaǵa barǵan saparynan keıin mınıstrlik tarapynan prorektordyń atyna shaǵymdar túsken.

Qos taraptyń bir-birine taǵyp otyrǵan aıyptary memlekettik mekemedegi kóp bylyqtyń betin ashyp berdi. Botakóz Kópbaeva jelide jarıa túrde shyndyq izdep shyryldaıdy. Memlekettik mekemelerde qarajattyń qalaı jymqyrylatyny jóninde ashyq jazady. Al Jánıa Áýbákirova aqtalyp álek. Bul elimizdiń mádenıet salasynda bolyp jatqan alǵashqy aıtys-tartys emes. Memleket qarjysynyń urlanýy, quıtyrqy joldarmen maqsatsyz jumsalýy ádettegi nársege aınalyp barady.