11 maýsymda Qazaqstan Respýblıkasynyń Úkimeti men Oman Sultandyǵynyń Úkimeti arasyndaǵy dıplomatıalyq, arnaıy jáne qyzmettik pasporttar ıelerin vızalyq talaptardan ózara bosatý týraly kelisimge qol qoıyldy, dep habarlaıdy 24.kz.

Qujatqa Qazaqstannyń Omandaǵy elshisi Erjan Muqash pen Oman Syrtqy ister mınıstriniń orynbasary Mýhamed bın Iýsýf bın Qasym Az-Zarafı qol qoıdy.

Úkimetaralyq kelisimge qol qoıylýy eki el arasyndaǵy sharttyq-quqyqtyq bazanyń júıeli keńeıtýine mańyzdy qadamy boldy.

Aıta keter jaıt, ótken jyly Oman Úkimetiniń sheshimi boıynsha Qazaqstan azamattary AQSH, Kanada, Avstralıa, Ulybrıtanıa, sondaı-aq Shengen kelisimi elderiniń vızalary nemese osy elderde turaqty turýǵa ruqsattary bar bolǵan jaǵdaıda, veb-saıt arqyly týrısik vızalardy (e-vıza) jergilikti demeýshisiz ala alatyn 25 eldiń tizimine engizildi. Bul jaǵdaı Qazaqstan men Oman arasynda ekijaqty týrızm salasyndaǵy qarym-qatynastardy nyǵaıtýǵa múmkindik beretini sózsiz.

Óz kezeginde Oman Sultandyǵy shaqyrýsyz jeńildetilgen tártip boıynsha qysqa merzimdi Qazaqstan vızasy beriletin 48 memlekettiń qataryna kiredi.

Týrızm salasyndaǵy ekijaqty qarym-qatynastardy nyǵaıtý maqsatynda Qazaqstannyń Omandaǵy elshiliginiń qoldaýymen iri omandyq Majan Light Travel & Tourism kompanıasy men AL Baleed Resort kompanıasy ókilderiniń 2017 jylǵy sáýirde Almatyǵa sapary uıymdastyryldy. Omandyq kompanıalardyń ókilderi qazaqstandyq áriptesterimen kezdesip, ózara tıimdi yntymaqtastyqtyń bolashaq damý joldaryn talqylady.

2017 jylǵy qyrkúıekte qazaqstandyq týrısik kompanıalarynyń ókilderi Omanda qarymta saparmen bolyp, eki elidiń týrısik kompanıalar arasynda tyǵyz baılanys ornatyldy.