Almatyda elimizge tanymal klasıkalyq mýzyka janrynyń maıtalmandary Astananyń 20 jyldyǵyna arnap qala qonaqtary men turǵyndaryna tamasha kesh syılady, dep habarlaıdy Qamshy.kz aqparat agenttigi.
«Júrektegi armanmen, shyńdarǵa shyǵý jolynda!» atty konsertte QR Tuńǵysh Prezıdent qorynyń laýreattary óner kórsetti.
Abaı atyndaǵy Qazaq memlekettik akademıalyq opera jáne balet teatryna jınalǵan kópshilik álemdik opera jáne klasıkalyq mýzyka janrynyń marjandaryna sýsyndady.
Teatr foesinde Astananyń 20 jyldyǵyna arnalǵan «Astana – Uly dala jaýhary» atty fotokórme uıymdastyryldy.
Konsert Nurjan Baıbosynovtyń jetekshiligimen QR Memlekettik akademıalyq sımfonıalyq orkestriniń mýzykalyq súıemeldeýimen ótti.
«Úlken Opera» taqyrybymen ótken kesh kompozıtor Tiles Qajyǵalıevtiń «Qyz qýý» ývertúrasymen ashyldy.
«Strana ýlybok» operettasynan Lıza men Sý Chongtyń dýetin oryndaǵan Bıbigúl Januzaq pen Medet Chotabaev kórermenniń erekshe yqylasyna bólendi. Vengr kompozıtory Frans Legarǵa 20 ǵasyrdyń basynda erekshe tanymaldylyq ákelgen úsh aktili shyǵarmada erekshe mahabbat oqıǵasy baıandalǵan. Qos ónerpaz atalmysh shyǵarmanyń máni men mazmunyn ashyp, kópshiliktiń júreginen oryn ala bildi.
Bul keshti adamzattyń mýzyka ónerine degen kózqarasyn ózgertip, án álemine erekshe qanyq boıaýlar ákelgen tanymal kompozıtor Lúdvıg Van Bethovenniń shyǵarmalarynsyz elesteý múmkin emes edi. Uly mýzykanttyń Vıolonchel, skrıpka jáne fortepıanoǵa arnalǵan úzdik shyǵarmasyn «Forte» trıosy el nazaryna usyndy.
Mazmuny bólek, máni erekshe keshte tek klasıkalyq mýzyka maıtalmandary óner kórsetken joq. Ótken ǵasyrdyń ortasynda Lenıngrad opera jáne balet teatrynda Aram Hachatýránnyń jetekshiligimen alǵash ret sahnalanǵan «Spartak» baletinen úzindini «Astana Balet» teatrynyń solıseri Madına Baspaeva men Serik Nakıspekov oryndap shyqty.
Halyqaralyq festıválderdiń jeńimpazy Medet Chotabaev Djakomo Pýchchınıdiń álemdik sahnalardyń qazynasyna aınalǵan Turandot operasynan Kalafanyń arıasyn shyrqady.
Konsertke Reseı men Eýropaǵa keńinen tanymal otandyq opera juldyzy Súndet Baıǵojın de qatysty. Ol Latıf Hamıdı men Ahmet Jubanovtyń «Abaı» operasynan úzindi oryndady. Aıta keteıik, Súndet Baıǵojın atalǵan shyǵarmany Reseıdiń «Bolshaıa opera» jobasynda qalyń kópshilik nazaryna usynyp, qazylar alqasynyń tańdanysyn týdyrǵan bolatyn.
Asqaq ónerdiń qadir qasıetin boıyna sińirgen opera ánshisi Tatána Vısınskaıa áıgili «Karmen» operasynan úzindi shyrqap, keshtiń kórkin qyzdyra tústi.
Áýezdi áýen men mazmundy shyǵarma, mýzykalyq ıirim men sazdy yrǵaq úılesim tapqan konsert Djýzeppe Verdıdiń Aıda operasynan alynǵan úzindimen qorytyndylandy.
Sonymen qatar konsertke Gaýhar Tasbergenova, Bıbigúl Januzaq, Gúlzat Daýrbaeva, Ermek Kýrmanaev, Erkebulan Saparbaev, Anastasıa Kojýharova, Emıl Sakavov syndy ónerpazdar qatysyp kórermenniń ystyq yqylasyna bólendi.
Áserli keshten soń ónerpazdar teatr foesinde kórermenderge qoltańba berip, estelikke sýretke tústi.
