Tájikstanda budan bylaı terorızmdi qoldap, terakt jasaýǵa ashyq shaqyrǵandar 10 jyldan 15 jylǵa deıin bas bostandyǵynan aıyrylýy múmkin.
Tájikstan parlamenti tómengi palatasynyń depýtattary 13 maýsymda Qylmystyq kodekstiń "Terrorlyq sıpattaǵy qylmystardy jasaýǵa shaqyrý jáne (nemese) terrorlyq is-áreketterdi jarıa túrde aqtaý" degen 179-babyna engizilgen ózgerister men tolyqtyrýlardy bir aýyzdan maquldady. Atalǵan bapqa "Internet arqyly" degen sóz tirkesi engizilgen. Iaǵnı, áleýmettik jeliler arqyly terorızmge úndegender uzaq merzimge bas bostandyǵynan aıyrylady.
Tájikstannyń sot tájirıbesinde Facebook-te terrorlyq sıpatta delingen materıaldarǵa "laık" basqany úshin jaýapqa tartylǵan birneshe oqıǵalar bolǵan.
Tájikstandaǵy táýelsizdik BAQ-tyń ulttyq qaýymdastyǵy tóraǵasy Nýrıddın Karshıboev Qylmystyq kodekske engizilgen ózgeristerdi ekstremızm jáne terorızmge qatysty qylmystyq jazany qataıtý dep biledi. Onyń sózinshe, osyǵan deıin keıbir zańdarǵa engizilgen ózgerister bul máselege tikeleı ne janama qatysty bolǵan.
"Kez kelgen esi durys adam terorızm men ekstremızmniń paıda bolýyn qoldamaıdy. Biraq quqyq qorǵaý organdary zań normalaryn durys taldamaıdy degen qaýip bar. Sol úshin parlament ókilderi halyq arasynda durys túsindirý jumystaryn júrgizý kerek", - deıdi ol.
