Muǵalimderge nesıe aldyryp, jalaqylaryn jeke paıdasyna jaratqan mektep dırektorynyń basy daýǵa qaldy. Kelinshek qol astyndaǵy qyzmetkerlerinen qaryzǵa aqsha alyp, ony qaıtarýdy suraǵandarǵa jumystan shyǵaramyn dep ses kórsetken, dep jazady Qamshy.kz aqparat agenttigi Eýrazıa arnasyna silteme jasap.

Qaraǵandy oblysyndaǵy Aqqoı aýylyndaǵy jıyrma ustaz osylaı dep, bizdiń arnaǵa janaıqaılaryn jetkizdi. Bilim ordasyna jınalǵan pedagogtar bir pátýaǵa kelmeı, dırektorlardyń jaqtastarymen judyryqtasýǵa deıin bardy. Oqıǵa ornynda bizdiń tilshilerimiz de bolyp qaıtqan edi! 

Oqýshylardy jazǵy demalysqa jibere sala, bir-birimen jaǵa jyrtysqan mektep qyzmetkerleri bul. Bir tarap - qaryzǵa belshesinen batyryp qana qoımaı, ózine doq kórsetken dırektoryna qarsy daý shyǵarsa, endi bireýleri mektep basshysyna shań jýytpaı álek. 
«Áı, bir-birińe aıtaqtap ne boldy? Bir-birińe aıtaqtap salyp?!))
Shet aýdanyna qarasty Aqqoı aýylyndaǵy ustazdardan uıqy ketkeli qashan?! Dırektor Janar Jamanadınanyń jamandyǵyn kórip, jastyqqa bastary tımegen jas mamandar basshysynyń bar bylyǵyn jaıyp saldy. 

«Seni jumysqa alý úshin vahterdyń ornyna, maǵan bes aılyq jalaqyńdy berip otyrasyń dedi. Men ony almaımyn. Sosyn bes aılyqty ol kisige aparyp júrdim. Kartochkama túsedi aqsha, 27 myńdy ol kisige aparamyn» - deıdi Aqqoı aýylyndaǵy jalpy bilim berý mektebiniń qyzmetkeri Janna Zulpyharaeva.

Mektep ishinen ashylǵan shaǵyn balabaqsha qyzmetkerleriniń ózi dırektordan ábden zárezap bolǵan. Balalarǵa arnalǵan as-sýdy jetkizýshi merdiger kompanıaǵa aqsha tóleýden bas tartqan basshy qarajatty tóleýge bóbekjaı mamandaryn mindettegen. 

«Árıne bizge qysym kórsetedi! «Men senderge osy balabaqshany ashyp berdim, men qysqartam, men jabam, men shyǵaram» dep bizge qyspaq kórsetip, aıqaılaıdy» - deıdi Aqqoı aýylyndaǵy balabaqsha qyzmetkeri Bazarhan Nurjan.

Shyndyq izdep shyryldap júrgenderdiń biri – Dáýletkereı Kábeı. Ol osy mektepte 15 jyldan beri úzdiksiz jumys istep kele jatqan áıeliniń quqyǵyn qorǵap kelgen. 

«Bir jarym jyl boldy, osy jańa dırektor kelgeli áıelim qysyp kórip júr. Basynda bilmedik ol kisiniń alaıaq ekenin. 60 myń teńge qaryzǵa aqsha alyp, qaıtarmady. Áne berem, mine berem dep júrdi, qaryzdy surasa «jumystan shyǵaramyn, aılyǵyńdy qysqartamyn», dep qorqytqan» - deıdi Aqqoı aýylynyń turǵyny Dáýletkereı Kábeı.

Mektep qyzmetkerleri dırektordyń bylyǵyn aıtyp aýdandyq bilim bólimine talaı barsa da, aryzdary aıaqasty bolady eken. Shet aýdanyndaǵy «shefteri» esh dálelderińiz joq dep, shaǵymdaryn keri qaıtarýdan sharshamaıtyn kórinedi. 

«Jıyrma bes muǵalimniń jıyrmasy ádilettilik taba almaı,  osyndaı qadamǵa barýǵa týra kelip tur. Bul qadamnyń artynda úlken salmaq baryn biz de túsinemiz, bizdiń basymyzǵa qandaı nárse keletinin. Ádilettilik taba almadyq, biz júgirip biraz jerge aryzdandyq. Barlyǵy kelip aýdan kólemine kelip tireledi, al aýdandaǵylar «dálelderińiz joq», dep jabýly qazan kúıinde qalady» - deıdi Aqqoı aýylyndaǵy jalpy bilim berý mektebiniń muǵalimi Zaǵırash Estaıqyzy.

Mekteptegi mamandarmen birneshe mınýttyq suhbattar úzile berdi. Dırektor Janar Jamanadınanyń jamandalǵanyna jany shydas bermegen jaqtastary kóshege shyǵyp ta janjal shyǵardy. 

«Elge qysym kórsetip jatyr!  Ne qysym, uryp jatyr ma, soǵyp jatyr ma? Aqsha alyp jatyr? Kimnen aqsha alyp jatyr?».

Dırektorǵa shyn jany ashyǵan jan ba, álde basy bálege qalǵan basshynyń týysy ma kim bilsin,  janjalǵa aýyldaǵy keıýanalardyń biri de kılikti. 

«Men shyndyqty aıtamyn, muǵalimder ózderi kelip bólinip aldy bular».

Al janjalǵa sebepker bolǵan Janar Jamanadınanyń aýrýhanada jatqanyn bildik. Dereý telefon nómirin taýyp, dırektordy sózge tarttyq. Bilim ordasyna basshylyq etkenine kóp bola qoımaǵan kelinshek, qol astyndaǵy qyzmetkerleriniń kesirinen densaýlyǵy kúrt nasharlap, aýrýhana tósegine tańylǵanyn jaıyp saldy.

«Meniń tarapyma kelip túsken aryz-shaǵymdar boıynsha, bul barlyǵy jalǵan málimetter. Bul málimetter zań aıasynda sheshilýi kerek. Bul aýyl turǵyndaryna mektep muǵalimderi tarapynan túsip jatqan aryzdardy toqtatý kerek dep esepteımin. 1,5 jyldyń ishinde bul densaýlyǵyma áser etip, qazirgi tańda aýrýhanada jatyrmyn. Densaýlyǵyma qatty áser etti osy jaǵdaılardyń barlyǵy. Ózimniń mektebimniń muǵalimderi ǵoı dep bárine kóz juma qaraǵan edim. Endi aýrýhanadan shyqqan boıda, zań oryndaryna júginemin dep sheshim qabyldap otyrmyn» - deıdi Aqqoı aýylyndaǵy jalpy bilim berý mektebiniń dırektory Janar Jamanadına.

Al Shet aýdanynyń bilim bóliminiń basshysynyń sózinshe, istiń aq-qarasy anyqtalý ústinde. Muǵalimderdiń shaǵymy tolyq tekserilip, birer kúnde sheshim shyǵarylady. 

«Áýelgi túsken ótinishter boıynsha birneshe ret baryp kezdesý ótkizilip, birneshe ret baryp tekseris jumystary júrgizildi. Zań oryndaryna bul qaǵazdar jiberilgen. Naqty zań organdary bir-eki kúnde jaýaptaryn berýi kerek» - deıdi Shet aýdany bilim bóliminiń basshysy Eldos Smaǵulov.

Qos taraptyń qaısysy durys, qaısysy burys ekenin endi zań organdary anyqtaıtyn bolady. Ázirge, mektep muǵalimderi men dırektor arasyndaǵy daýǵa qatysty aýyl turǵyndarynyń dúdámal boljamdary men qańqý sózderi eldimekende jeldeı esip júr.