Almaty qalasyndaǵy №4 kitaphanada Astananyń 20 jyldyǵyna oraı «Aıqyn» gazetiniń bas redaktory, Qazaqstannyń eńbek sińirgen qaıratkeri, pýblısıs Nurtóre Júsippen kezdesý ótti.
İs-sharanyń basty maqsaty – Elordanyń Qazaqstannyń damýyna qosqan úlesi men atqarylǵan aýqymdy isterin jastarǵa jáne qala turǵyndaryna jetkizý. Keshegi men búginin salystyra otyryp, saraptama jasaý. Kezdesýge aqyn, Ǵabıt Músirepov pen Sábıt Muqanov atyndaǵy murajaı dırektory Ádilǵazy Qaıyrbek, Almaty ǵaryshy quqyqtyq tehnologıalyq kolej oqytýshylary Klychnázova Gúlnar, Bólekbaeva Nazgúl jáne stýdentter, jas búldirshinder qatysty.
Ótken 20 jyl ishinde elimizdiń bas qalasy – Astana tórtkúl dúnıeni túgel tamsandyrǵan tarıhı qubylysqa aınalǵany aqıqat. Arqa tósinde sáni men saltanaty jarasyp, ozyq ıdeıalardy, jańa ǵylymı sheshimder men sáýlet óneriniń ozyq úlgilerin ómirge ákeldi. Tolǵaqty túıinderdi talqylaıtyn jahandyq ortalyqqa aınaldy. Osy oraıda Nurtóre Júsip jastarǵa Astanany jan-jaqty tanystyryp, baǵyndyrǵan belesin aıtpas buryn ol: «Qazaqtyń osyǵan deıingi júrip ótken joldaryn qaraıtyn bolsaq, ár ǵasyrda qıyn kúnder keshken. 20 ǵasyr ultymyzǵa eń aýyr, úlken zardaptar ákelgen zaman boldy. Osyǵan oraı, 21 ǵasyrǵa aýysqan ýaqytta ótken shaqtan qalǵan úreımen, bolashaqqa halyq kúdikpen qarady. Biraq múldem basqasha bastaldy. Árıne bunyń barlyǵyn aýyzben aıtý op-ońaı. 2002 jyly Astananyń sol jaq jaǵalaýynda báıterek pen qazirgi Kólik jáne komýnıkasıa mınıstrligi otyrǵan eki bıik ǵımarat qana bar edi. Ótken men búgindi salystyrar bolsaq, aıyrmashylyq aspan pen jerdeı. Adam senbesteı ózgerdi. Az ýaqyt ishinde alyp qalalar qataryna qosyla aldy. Jutylýǵa jaqyn qalǵan ult, óz qolymen óziniń astanasyn saldy»,– dep aldymen ótken tarıhqa toqtaldy. Sonymen qatar, «Jan baǵyp kún keshken ult, jańa ǵasyrda sapalyq ózgeriske tústi. Astanadaǵy eń alǵash kimge eskertkish qoıylǵanyn bilesizder me? Qazaqtyń sońǵy hany Kenesary Qasymulyna. Onyń da sımvoldyq máni bar. Mine, qazaq sapalyq turǵyda óz elordasyn ózi salyp, álemmen básekege túse alatyn jaǵdaıǵa jete aldy. «Keldi, kórdi, jeńdi»,– degen ejelgi zamannan qalǵan ataqty sóz bar. Sol sıaqty bizdiń halyq «Elordaǵa bardy. Astanany saldy. Úlken bıikti baǵyndyrdy»,– dep aýyz toltyra aıta alamyz. Elbasynyń salıhaly saıasaty Astanany arqa tósine aparyp, qazaqtyń ǵajap qalasyn salý arqyly, táýelsizdiktiń irgesin myqtap bekitip berdi», – dep jetken jetistigimizdi jete túsindirdi.
Kezdesý barysynda Nurtóre Júsip qaımaǵy buzylmaǵan qazaq halqynyń burynǵy men búgingi qarqynyn tolyqtaı qamtyp shyqty. Buǵan qosa stýdent jastarymyz da barynsha belsendilik tanytty. Biri án aıtsa, endi biri alyp shaharǵa arnap shyǵarǵan óleńderin oqydy. İs-shara sońynda eńseli qalaǵa baılanysty vıktorınalyq suraqtar qoıylyp, durys jaýap bergenderge kitaptar syılady.
Aıta keteıik, kezdesýdi Almaty qalasy İshki saıasat basqarmasy men «El-shejire» qoǵamdyq qory uıymdastyrdy.
