Sheıh Ábsattar qajy Derbisáliniń múftıatty basqarǵan tusy halyqtyń dinge betburysy keremetteı aýjalǵan bir kezeń boldy. Sonymen qatar, bul kezeńde eldegi din erkindigin aram pıǵylmen paıdalanyp, qoǵamǵa zıan keltiretin keri dinı aǵymdardyń taralýy áshkerelenip, olarmen kúresý sharalarynyń qolǵa alynǵan kezenin ótkerdi. Alaıda, bul memlekettik dinı basqarmanyń isi emes edi. Ol Ata zańymyzda ruqsat etilgen "erkindiktiń" teris nátıjesi bolatyn. Al osy oraıda, dinı basqarma shama-sharqynsha óziniń quqyǵy kólemindegi isterden esh aqaý shyǵarmaı, jemisti atqardy. Muny ımamdardyń saralanýynan, taldanyp qoıyla bastaýynan, dinı basqarmanyń bet-bedeliniń halyq aldynda kúnnen-kúnge kóterilýinen aıqyn kórýge bolady. Dinı saıttar qatarynyń molyǵýy jáne onyń kásiptik deńgeıiniń sát sanap ósýi – basqarma jumysynyń durys júzege asyrylýynan bolsa kerek. Bul ketkeli otyrǵan múftıge oń baǵamyzdy berýimiz odan bir nárse dámetý emes, qaıta etken eńbegin laıyqty baǵalaýymyz! Anyq baǵa, árıne bárin bilýshi, shynaıy ádil baǵalaýshy Allah taǵalanyń quzyrynda!
Al endi keletin múftıden neni kúter edik? Endigi múftıdiń kim ekenin áli bilmeımiz! Deı turǵanmen, meıli qaı azamat kelse de, ol sózsiz Allah taǵalanyń qalaýyndaǵy adam ekeni daýsyz! Allah keleshek mýftıdi kim bolatynyn qalasa Óz erki ári sol azamat mýftılikke eń laıyq tulǵa bolǵany! Joly bolsyn! Halyqtyń bir múshesi retinde qarsy alamyz!Sonymen qatar, biz keler mýftıden kóp ıgi jaqsylyq kútemiz! Óıtkeni búgingi tańda elimizdiń din salasynda kúrmeýi qıyn kókeıtesti máseleler jeterlik. Onyń birinshisi árıne, "aǵymdardyń" kóbeıýi. Jańa múftı san saqqa shashyrap, bastary qosylmaı ketken osy toptardyń basshylaryn bir ortalyqqa toǵystyrsa, olardy qoǵamǵa zalal keltirmeıtin ortaq mámilege keltirse. Bir sózben aıtqanda, aǵymdardy «aýyzdyqtaýǵa» kiriskeni jón der edik!
Ekinshi, "Din zańyna" ózgerister men tolyqtyrýlar engizilgeni jón. Zańdaǵy bul jańalyqtar eldiń din isine tolyq jaýap beretindeı deńgeıde bolsa, zań halyqtyń ıgiligi úshin qyzmet isteıtindeı tıanaqtalsa!
Úshinshi, elimizden shetelden din ilimin oqıtyn oqýshylardyń qaı elde, qandaı bilim alyp jatqandyǵyn baqylap otyrý qajet. Sondyqtan, dinı bilim berýdi basqarma óz qolyna alýy kerek. Áıtpegende, shetelde belgisiz baǵytta bilim alyp, elimizge kelip dinge jat pikir taratatyndar esebinen aǵymdardy tejeý qıynǵa túsetin bolady.
Tórtinshi, memlekettiń ımamdarǵa eńbekaqy taǵaıyndaý máselesi óz sheshimin tabýy qajet. Memleket din "saıasattan tys" ekenin alǵa tartýy múmkin. Deı turǵanmen, qazirdiń ózinde ol saıasat qaǵaz júzinde qalyp otyrǵany da shyndyq. Óıtkeni, din saıasattan tys bolǵanymen, júreginiń ishinde bolady ǵoı. Demek, din isi qansha saıasattan tys bolǵanymen, memleket ony belgili mólsherde qadaǵalaıtyny sózsiz. Dinı qyzmetkerlerge memleket kóz qyryn salsa kerek.
Besinshi, qazirgi júzege asyrylyp jatqan tutas eldi bir ǵana mázhabty ustanýǵa kóshirý maqsaty túbegeıli iske asqanǵa deıin bul jaıtty júıeli ári jaýapkershilikpen qadaǵalap otyrýdy bir sátke de nazardan tys qaldyrmaý kerek.
Altynshy, ımamdardyń halyqpen jumys isteýine kóńil bólinse. Imamdardyń mekteptermen, qoǵam múshelerimen tyǵyz baılanysta bolýlaryn myqtap qadaǵalaǵan jón.
Eń sońynda aıtarymyz, dinı basqarma músheleri jáne ımamdar baspasózden únemi kórinip, kópshiliktiń kókeıindegi suraqtarǵa jaýap berip otyrýǵa umtylýy lazym. Tipti osy basqarmanyń tikeleı óz quzyrymen taratylatyn telearna ashylsa. Bul da óte ózekti máselelerdiń biri.
Bizdegi qoǵamdyq talap − osy. Kisilik úmit! Jalǵasty «jaqsy bolsaqtyń» janaıǵaıy.
Sońynda Allah taǵala jańa múftıdiń ilimin tereń, bet-bedelin bıik, elge juǵystylyǵyn bersin! Jáne iskerlik násip etsin!Qul-Kerim Elemes
"Qamshy" silteıdi
Pikir qaldyrý