Qostanaıda belgisiz áıel óz balasyn avtovokzalda qaldyryp ketken, - dep habarlaıdy Qamshy.kz aqparat agenttigi "Kostanaıskıe novostı" saıtyna silteme berip.
Basylymnyń málimetinshe, bala 17 maýsymda shamamen saǵat 20.40-ta tabylǵan. Oqıǵa ornyna ıývenaldy polısıa qyzmetkerleri men jedel qyzmettegiler barǵan. Balany kúzet qyzmetkerleri tapqan. Olar analar men balalarǵa arnalǵan bólmeden balanyń jylap jatqan daýsyn estigen. Bala kereýette jatqan. Jasy shamamen 1,5-da.
Qazirgi ýaqytta balanyń anasyn izdestirý jumystaryna jeke quram jumyldy. Bala úıde, oǵan tárbıeshiler qarap jatyr.
Polısıa balanyń anasy jaıly qandaı da bir málimet biletinderden myna nómirler boıynsha habarlasýdy suraıdy 8-777-363-04-24 nemese 102.
