Qazaqstandyq advokat Abzal Quspan shekarany zańsyz kesip ótti degen etnıkalyq qazaq Saıragúl Saýytbaıdyń isine qatysty tergeý jumystarynyń barysymen tanystyrdy, dep habarlaıdy Qamshy.kz aqparat agenttigi.
Búgin bir top jýrnalıs pen Abzal Quspan Saıragúl Saýytbaı jatqan Taldyqorǵandaǵy tergeý ızolátoryna bardy. Advokat áıelmen jeke kezdesip, jaǵdaıyn óz kózimen kórip, istiń mán-jaıyn bilip qaıtty. Tergeý ızolátoryna barǵan jýrnalıserdiń biri Sáýle Ábedınova Facebook-tegi paraqshasynda vıdeo jarıalady.
"Ony Qazaqstanda qaldyramyz ba, joq pa? Buǵan qatysty sheshim qabyldanǵan joq. Saıragúl osyǵan ǵana alańdap otyr. Qandaı jaǵdaı bolmasyn, Qytaıǵa jiberýge bolmaıdy. Tergeý aıaqtaldy, istiń mán-jaıyn ázirge aıta almaımyn. Saıragúl de, biz de bilemiz qandaı jaǵdaı bolǵanyn", - dedi Abazl Quspan.
Saıragúl Saýytbaıǵa qatysty 368-baptyń 1-bólimi «Shekarany zańsyz kesip ótý» boıynsha aıyp taǵyldy. Abzal Quspannyń aıtýynsha, munda áıeldiń zańsyz áreketinen buryn maqsaty negizge alynady. Al dúıim jurtqa málim Saıragúldiń maqsaty – óz otbasyna asyqty. Tek Qytaı tarapy onyń qujattaryn belgisiz sebeptermen tartyp alǵan.
"Saıragúl alańdap otyr. Qazaqstannyń túrmesinde otyrsam da, osynda qalsam boldy", - dep jetkizdi advokat áıeldiń sózin.
Saıragúl Saýytbaı úkim shyqqan ýaqytqa deıin Taldyqorǵandaǵy tergeý ızolátorynda otyratyn bolady. Tergeý qyzmetkerleri men ondaǵy turmystyq jaǵdaıyna baılanysty eshqandaı shaǵymy joq eken. Tipti joldasy men eki balasyn da kóre alatyn múmkindik bar. Densaýlyǵy da qalypty. Abazl Quspan kúdikten úmit basym dep otyr. Tek kóshi-qon komıteti men prezıdent janyndaǵy komısıa arqyly áıelge Qazaqstan azamattyǵyn alyp berý kerek deıdi. Sonda másele ońynan sheshiledi.
Bıyl sáýirdiń ortasynda Qazaqstanǵa ótken Saıragúldi mamyrdyń 22-si keshke 21.00-21.30-dar shamasynda shekara qyzmetkerleri, úıinde otyrǵan jerinen ustap áketken. Sebebi áıel Qazaqstan shekarasynan qujatsyz ótken. Al áıeliniń qujatsyz qalaı ótkeninen joldasy Ýálı Silám habarsyz edi. Alǵashynda Jarkenttiń ýaqytsha tergeý ızolátorynda otyrdy. Bir-eki apta buryn Taldyqorǵan ýaqytsha tergeý ızolátoryna aýystyrdy.
