Jambyl oblysyndaǵy aýdarylǵan poıyzdyń mashınısi ustalmaǵan, dep habarlaıdy Qamshy.kz aqparat agenttigi.
QR Bas prokýratýrasynyń baspasóz qyzmeti taralyp ketken aqparat jóninde resmı málimdeme jarıalady.
"Búgin túrli aqparattyq agenttikterde «Astana-Almaty» baǵytyndaǵy jolaýshylar poıyzy lokomotıvin basqarǵan mashınısti polısıa ustaǵandyǵy týraly shyndyqqa saı kelmeıtin aqparat jarıalandy.
Qazirgi tańda atalǵan fakt boıynsha sotqa deıingi tergep-tekserý júrgizilýde jáne onyń barysynda ustaý júrgizilmegendigin resmı túrde habarlaımyz", - delingen habarlamada.
Sonymen qatar habarlamada, oryn alǵan temirjol oqıǵasyna qatysty ınvestısıalar jáne damý mınıstrligi janynan arnaıy komısıa qurylǵany aıtylǵan.
QR İshki ister mınıstri Qalmuhanbet Qasymov seısenbidegi úkimet otyrysynan keıin jýrnalıserge suhbat berý barysynda mashınıstiń ustalý deregine baılanysty pikir bildirdi.
"Mundaı málimetti kim taratty? Bul jalǵan aqparat. Mashınısti tergeýden soń bosatty. Bul degen úlken qylmystyq is. Qazir saraptama júrip jatyr", - dedi mınıstr.
Esterińizge sala keteıik, 17 maýsymda saǵat 13:25 shamasynda Sary-SHaǵan - Shý stansıasynda Astana-Almaty baǵytyndaǵy jolaýshylar poıyzynyń 8 vagony relsten shyǵyp ketken bolatyn. Nátıjesinde bir jas óspirim qaza taýyp, 24 adam jaralandy. Qaza tapqan 12 jastaǵy balanyń denesi týǵan jerine jetkizildi. Alekseı Melnev Qaraǵandy oblysynda búgin jer qoınyna tapsyrylady. Al apattan zardap shekken taǵy bir jolaýshyǵa keshe ota jasaldy. 48 jastaǵy Astana turǵynynyń hali qazir jaqsy.
