Tirideı janyp kete jazdaǵan jetkinshektiń anasy onyń ústine kórshi úıdiń balalary ádeıi ot qoıǵan dep esepteıdi. Sondyqtan buzaqylar men olardyń ata-anasyn qatań jaýapqa tartqyzýdy talap etip otyr, dep habarlaıdy Qamshy.kz aqparat agenttigi sputniknews.kz-ke silteme jasap.
Budan buryn habarlanǵandaı, Tarazda 6 jastaǵy bala kóshede júrip otqa oranǵan. Ony týǵan aǵasy der kezinde baıqamaǵanda tirideı janyp ketýi múmkin edi. Jan ushyra aıǵaılaǵan baýyrynyń daýysyn estigen ol dereý jetip arqasyndaǵy lapyldaǵan otty sóndirgen. Zardap shegýshiniń anasy bul jaǵdaıǵa kórshi úıdiń 7 jastaǵy egizderin aıyptaıdy.
"Esin jıǵannan keıin ulymnyń ózi aıtty. Roma degeni Maksımniń ústine benzın shashyp jibergen. Artynsha Danıl sirińkeni tutatyp laqtyrǵan. Qoıyńdarshy dep jalynǵan, biraq olar degenderin istegen", — deıdi Maksımniń anasy Vera Legostaeva.
Vera Legostaevanyń aıtýynsha, kórshisi janarmaı beketinde operator bolyp isteıdi eken. Balalar benzındi úıden alyp shyqqan kórinedi. Onyń ústine, olardyń buzaqylyqpen kózge túsýi birinshi ret emes dep otyr.
"Menińshe, bul balalardy ata-anasynan ajyratyp, arnaıy tártibi nashar balalar oqıtyn mektepke berip, áke-sheshesin de qatań jazalaý kerek. Mundaı jaǵdaı shetelde bolsa, dál osylaı jasar edi", — deıdi ashynǵan ana.
Al egizdediń anasy Natalá tentekterin aqtap álekke tústi. Onyń sózine súıensek, Maksım baıqaýsyzda ózin-ózi órtep alǵan.
"Muny qanisherlik, ádeıi istedi dep aıtýǵa kelmeıdi. Olar oınap júrip, ishinde suıyqtyǵy bar quty taýyp alǵan. İshindegisin ekinshi ydysqa quıyp sapyrǵan. Osy sátte órt shyqqan bolýy múmkin", — deıdi ol.
Denesiniń 18 paıyzy kúıip qalǵan Maksım úsh kún jansaqtaý bóliminde jatyp, jalpy palataǵa búgin shyqty.
"Balanyń qazirgi háli turaqty aýyr dep baǵalaımyz. Bir aptadan keıin ekinshi kezeńdegi operasıaǵa daıyndap jatyrmyz. Ol operasıa denedegi kúıgen terilerdi tazalap alý úshin qajet. Sodan keıin úshinshi kezeńde ol jerge basqa teri jabystyramyz", – dep málimet berdi Taraz qalalyq №2 aýrýhanasy kúıik bóliminiń meńgerýshisi Ábilseıit Sydyqov.
Maksımniń anasy qansha tyryssa da, balasyna jábir kórsetkender jazasyz qalatyn sıaqty. Sebebi kináli ekeni dálelden jaǵdaıda jas ereksheligine baılanysty jaýapqa tartylmaıdy. Degenmen istiń anyq-qanyǵyn bilý maqsatynda tergeý jumystary júrgizilip jatyr.
