Almaty ákimi Baýyrjan Baıbek megapolıstiń jetekshi týroperatorlarynyń qatysýymen «Týrızmdi damytýdyń 100 qadamy» qalalyq baǵdarlamasyn júzege asyrý boıynsha keńeıtilgen keńes ótkizdi.
Sońǵy úsh jylda sheteldik týrıser sany 14%-ǵa ósti. Almatyda bıylǵy jyldyń alǵashqy toqsanynda Ońtústik Koreıadan, Indıa men Reseıden, QHR-nan, Túrkıadan, AQSH pen GFR-nan 130 myńnan astam adam boldy. Onyń ústine týrısik lektiń 80%-ǵa jýyǵy qalǵan úsh toqsanda keledi.
Qala ákiminiń orynbasary Ásel Júnisova óziniń sózinde halyqaralyq «EKSPO-2017» kórmesiniń, Búkilálemdik Ýnıversıadanyń, OESR Eýrazıalyq aptalyǵynyń, sonymen qatar «Star of Asia», «Spirit of Tengri», «Uly dala oıyndary», «Almaty Marafon» jáne «Tour of Almaty» syndy mýzykalyq, sporttyq sharalardyń ótýi týrıser legine oń yqpal etkenin atap ótti.
«Búgingi kúni qala ekonomıkasynyń 87%-yn qyzmet kórsetý salasy quraıdy, alaıda Almatynyń jalpy óńirlik tabysynda týrızmniń úlesi nebári 1,5%. Megapolıstiń týrısik áleýetin arttyrý maqsatynda Almaty aglomerasıasynyń taý týrızmi boıynsha sheberlik - jospary jasaldy, onyń quramyna Medeý, Shymbulak, Almataý jáne Býtakovka endi. Bıylǵy jyly álemdik deńgeıdegi Kempinski jáne Novotel otelderiniń, túrli býtık – otelder men hostelderdiń qurylystaryn aıaqtaý josparlanǵan. Jyl aıaǵyna deıin 14 halyqaralyq agenttikter úshin BUU-nyń óńirlik HAB-y ashylady. Parıjdiń, Stambýldyń, Bangkoktyń tájirıbesi mundaı sharanyń sheteldik týrıser legin ulǵaıtatynyn, halyqaralyq deńgeıde qalanyń tanymdylyǵyn arttyratynyn kórsetti», - dedi Ásel Júnisova.
Ol sonymen qatar qazirgi kezde týrıserdiń kópshiligi óz betterinshe saparǵa shyǵatynyn, arnaıy veb-tuǵyrlar arqyly demalystaryn josparlaıtynyn aıtty.
«Jyl saıyn Almatyǵa degen qyzyǵýshylyq artýda, ony destınasıa arqyly álemdik TripAdvisor tuǵyrnamasynan kórýge bolady, onda qalaǵa qatysty suranys 465 ten 66 824 ótinimge ósken. Bul tuǵyrnamany kóbinese AQSH-tyń, Reseıdiń, Ulybrıtanıa men Indıanyń, Germanıanyń azamattary paıdalanady», - dep sózin jalǵastyrdy.
Óz kezeginde megapolıs ákiminiń orynbasary Murat Dáribaev Almatynyń basty týrısik «qaqpasy» retinde kólik toraptarynyń modernızasıalanyp jatqanyn aıtty.
Ol kelesi aıdan bastap barlyq qalaaralyq jáne halyqaralyq reısterdiń «Saıran» avtovokzaly arqyly iske asatynyn jetkizdi. Qazirgi kezde ǵımarat qaıta jasalýda, onyń aınalasy abattandyrylyp, kólik-logıstıkalyq ınfraqurylym modernızasıalanýda.
«Barlyq zańsyz konstrýksıalar alynyp tastaldy. Ǵımarattyń kire beris bóligin qaıta jasaý josparlanǵan, sonymen qatar taksı turaqtary men halyqaralyq qatynas aımaǵy keńeıedi. Nysan ishinde lokaldi týrısik ortalyq uıymdastyrý qarastyrylýda, oǵan jaqyn jáne alys sheteldermen jumys jasaıtyn qalalyq týroperatorlar ornalasatyn bolady. Avtovokzal ǵımaratynyń ishinde qoǵamdyq tamaqtandyrý núktelerin ashý úshin halyqaralyq brendtermen kelissózder júrýde», - dep baıandady Murat Dáribaev.
Bulardan ózge, «Qazaqstan temir jolymen» birge «Almaty-1» jáne «Almaty-2» temirjol vokzaldaryn qaıta jasaý jumystary júrýde. 200 avtomobıldi qysqa prokatka berý servısin ashý josparlanǵan. Eger ótken jyly Almatyda qoǵamdyq kóliktiń 479 birligi alynsa, bıylǵy jyly taǵy da 569 jańa avtobýs qatarǵa qosylady.
Keńes barysynda oǵan qatysýshylar páterlerin qysqa merzimdi jalǵa beretin kásipkerlerdiń jumysyn retteýge basa nazar aýdardy: «Qazirgi kezde magıstraldi kóshelerdiń boıynda turǵan adamdar páterlerin táýlik boıyna usynady. Olardyń jumysy kóleńkeli, salyq tólemeıdi. Páterlerin jalǵa usynǵandyqtan, múmkin olardy zańdastyrǵan jón shyǵar. Biryńǵaı núkte uıymdastyryp, olarǵa jaǵdaı jasaý qajet bolar. Jumystaryn jasasyn, biraq resmı túrde».
Bulardan ózge, týrıserdi tasymaldaıtyn týrısik kompanıalar avtobýstarynyń sertıfıkattary qaralatyn bolady. Bul shara qaýipsizdik pen qyzmet kórsetý sapasyn arttyrady.
Kezdesý barysynda Qazaqstandyq týrısik asosıasıa dırektory Rashıda Shaıkenova İle- Alataý saıabaǵynda týrıserdiń sýretke jáne vıdeoǵa túskenderi úshin aqsha tóleýdiń qanshalyqty zańdy ekeni týraly másele kóterdi.
Jıynǵa qatysyp otyrǵan İle-Alataý parkiniń bas dırektory Damır Malgeldıev tek komersıalyq túsirilimderge ǵana aqsha tólenetini týraly jaýap berdi. Eger ınspektor kelýshilerden aqsha talap etetin bolsa, shara qoldaný úshin ákimshilikke júginý kerektigin aıtty. Ol óziniń sózinde İle-Alataý parkin odan ári damytý týraly dıreksıanyń arnaıy konsepsıa jasaǵanyn, bul qujatty Almaty qalasy Qoǵamdyq Keńesi músheleriniń jiti qarap shyǵatynyn atap ótti.
Eske salsaq, qala keńistigi jaılylyǵyn qalyptastyrý maqsatynda Almatyda bıylǵy jazda 150-den astam kóshe jóndeledi, 30 km trotýarlar jasalady, 600 aýla kóriktendiriledi. Barlyq jer asty ótpeli joldar kúrdeli jóndeledi, jańa fontandar salynady. Buryn qaıta jasalǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańynan ózge megapolıstiń birqatar negizgi dańǵyldary túgeldeı jańarady.
