Otyrys aıasynda qazaq álipbıin 2025 jylǵa deıin latyn grafıkasyna kezeń-kezeńmen kóshirý jónindegi sharalar josparyn iske asyrý barysy qaraldy, sondaı-aq, jańa álipbıdiń emle erejeleri men pernetaqtanyń tehnıkalyq ornalasýyn ázirleý boıynsha jumysty odan ári úılestirý máseleleri talqylandy.
Álipbıdi latyn grafıkasyna kóshirý aıasynda júrgizilip jatqan jumystyń negizgi baǵyttary boıynsha mádenıet jáne sport mınıstri A. Muhamedıuly, bilim jáne ǵylym mınıstri E. Saǵadıev, aqparat jáne komýnıkasıalar mınıstri D. Abaev baıandama jasady.
A. Muhamedıuly búginde til mamandarynyń qatysýymen jumys toby Latyn grafıkasy negizinde qazaq álipbıiniń emle tujyrymdamasyn ázirlegenin atap ótti.
«Qazirgi tańda qazaq tiliniń orfografıasy men emle erejeleriniń negizgi tártipterin ázirleý boıynsha kúntizbelik jospardyń kestesi daıyndaldy. Jalpy, elimiz úshin mańyzdy til reformasy qazaq álipbıin 2025 jylǵa deıin latyn grafıkasyna kezeń-kezeńmen kóshirý jónindegi sharalar josparyna sáıkes júzege asyrylyp jatyr», — dedi A. Muhamedıuly.
E. Saǵadıev búgingi tańda A. Baıtursynov atyndaǵy Til bilimi ınstıtýtynyń qazaq jáne túrki tilderindegi termın jasamynyń halyqaralyq qaǵıdalary men erejelerin zerttep, ulttyq termınologıa krıterıılerin ázirlegenin habarlady.
Otyrys barysynda, sondaı-aq, Premer-Mınıstrdiń orynbasary E. Dosaev, Parlament Senatynyń depýtaty M. Baqtıaruly, Parlament Májilisiniń depýtaty B. Mamraev, Til bilimi ınstıtýtynyń dırektory E. Qajybek, fılologıa ǵylymdarynyń doktory, Abaı atyndaǵy Qazaq ulttyq ýnıversıtetiniń kafedra meńgerýshisi T. Aıapova, Sh. Shaıahmetov atyndaǵy «Til-Qazyna» Ulttyq ǵylymı-praktıkalyq ortalyǵynyń atqarýshy dırektory E. Tileshov jáne t.b. pikir bildirdi.
