Almaty ákimi Baýyrjan Baıbek Qazaqstan Respýblıkasyndaǵy Reseı Federasıasynyń Tótenshe jáne Ókiletti Elshisi Alekseı Borodavkınmen kezdesti. Taraptar saýda-ekonomıkalyq jáne mádenı-gýmanıtarlyq máselelerdi talqylady.
Reseı Qazaqstannyń turaqty ekonomıkalyq seriktesi bolyp tabylady. Almaty men Reseı Federasıasy arasyndaǵy taýar aınalymy turaqty ósýde, sońǵy jyldaǵy kórsetkish 22%-ǵa artqan. Almaty ákimdigi men Máskeý, Sankt-Peterbýrg jáne Qazan merıalary birneshe baǵyttar boıynsha yntymaqtasyp, jumys isteýde.
Qalada reseılik kapıtalmen 2 myńnan astam kásiporyn saýda, qarjy, medısına, ónerkásip jáne basqa salalarda jumys isteıdi. Qazirgi kezde Indýstrıaldy aımaqta kabel ótkizgish ónimder shyǵaratyn reseılik «KMK Investment» zaýyty salynýda.
Kezdesý barysynda Reseı Federasıasynyń Elshisi eki el Prezıdentteri men eki el halyqtary arasynda qashanda ózara senim men dostyq qatynastyń qalyptasqandyǵyn atap ótti.
«Búgingi kúni EAES aıasynda birikken aýqymdy jobalar júzege asýda. Sonymen qatar eki jaqty týrızmdi damytýda, bilim baǵdarlamalarynyń aıasyn keńeıtýde ózara úndestik keń qanat jaıýda. Orta Azıadaǵy eń iri qala retinde Almaty túrli halyqaralyq forýmdardy, konferensıalar men festıválderdi ótkizýde, bularǵa Reseı delegasıasy belsendi qatysty. Jaqyn kúnderi ǵana ODKB syrtqy ister mınıstrleriniń samıti, Eýrazıalyq medıa forým ótti. Osynyń barlyǵy mádenı jáne iskerlik baılanystardy odan ári damytýǵa yqpal etedi», - dep atap ótti Alekseı Borodavkın.
