Almaty ákimi Baýyrjan Baıbek sıfrlandyrý kúnderi aıasynda qalanyń startap - kompanıalarynyń ókilderimen kezdesti. «Smart.Poin» tehnologıalyq keńistiginiń alańynda beıresmı túrde startap - ortany damytýdyń barynsha mańyzdy máseleleri talqylandy.
Búgingi kúni Almaty sıfrlandyrýdy engizý jáne elimizdiń barlyq İT ónimderin shyǵarý boıynsha kóshbasshy. «Aqyldy qala» konsepsıasy barysynda qaýipsizdik, qoǵamdyq kólik, bilim jáne densaýlyq saqtaý salalarynda júıeli sıfrlandyrý jobalary iske asýda. Bul kreatıvti kásipkerler men startaperler úshin iri naryq bolyp tabylady.
Megapolıs basshysy jańa tehnologıalardy engizý prosesterdi ashyq júrgizýge jáne operasıalyq shyǵyndardy azaıtýǵa yqpal etetinin, sonymen qatar memlekettik apparat pen bızneste tıimdi ákimshilikke qol jetkizetinin atap ótti.
«Memlekettiń mindeti – búrokrattyq kedergilerdi barynsha azaıtý, tıisti ınfraqurylymdy qalyptastyrý, bıznes bastamalardy yntalandyrý. Ol úshin qalada túrli qoldaý sharalary júzege asýda, sonyń ishinde arnaıy ekonomıkalyq aımaqtar jáne mehanızmder arqyly kásipkerler qarjylyq resýrstarǵa qol jetkizýde. Degenmen, kedergiler de barshylyq, al olardy durys sheshý úshin biz jumys jasap jatqan kompanıalar ókilderimen ǵana emes, isti endi ǵana qolǵa alǵan startaperlermen de turaqty kezdesemiz», - dedi Baýyrjan Baıbek.
Almatylyq startaperlermen kezdesý kezinde álemniń oqý oryndaryndaǵy granttar men stıpendıalar týraly aqparat beretin «NeUpusti.net» servısi, «Web-kassa» kasaalyq apparaty, «Býhta» onlaın - býhgalterıasy, qujattar men adamdardyń júzin anyqtaıtyn «Verigram» júıesi, «Torgai» qarjy esebiniń onlaın-platformasy, aıyppuldardy tóleý jáne tekserý jónindegi «Okauto» servısi tanystyryldy..
«Nur.kz» portalynyń jańa medıa - jobalary týraly onyń bas dırektory Qýat Bahrıdınov aıtyp berdi. Jaqyn arada Qazaqstandaǵy jańa mýzykalyq strımıng servısin jáne otandyq kontentke kóshirilgen vıdeokontentti «video on demand» onlaın - alańyn júzege asyrý josparlanǵanyn jetkizdi.
Kezdesý barysynda Baýyrjan Baıbek Almaty ákimdiginiń keri baılanys pen praktıkalyq mindetterdi sheshý úshin mundaı kezdesýlerdi turaqty ótkiziýge daıyn ekenin aıtty. Óz kezeginde «Relog» kompanıasynyń negizin qalaýshy, kólik logıstıkasyn ońtaılandyrý jónindegi servısti qamtamasyz etýshi «Tártip» AQ jumys isteýdiń kúrdeli ekeni týraly másele kóterdi.
«Bizdiń ónimimiz arnaıy kólik logıstıkasyna ketetin shyǵyndy azaıtady, al bul turmystyq qatqyl qaldyqtardy tasymaldaýmen aınalysatyn kompanıa úshin óte tıimdi. Ońtaılandyrý kólik baǵytyn utymdy uıymdastyrý, monıtorıń pen júıedegi saraptama fýnksıalary esebin durys basqarý barysynda júzege asady», - dedi Baýyrjan Rústemov.
Megapolıs basshysy tıisti basqarmalarǵa qalanyń komýnaldyq qyzmetterinde olardyń jumys tıimdiligin arttyrý úshin kompanıalardyń IT-ónimderin paıdalaný jóninde tapsyrma berdi.
«Biz úshin «Aqyldy qala» – turyndar men bıliktiń iske transformasıalyq jáne mádenı turǵydan kelýi. Tehnologıalar — bul barlyq basqarý prosesteriniń tıimdiligin arttyrýdyń quraly ǵana. Biz sizderden jańa ári paıdaly ónimderdi, kreatıvti ıdeıalardy kútemiz jáne ózgersterge daıynbyz, osy jolmen birge júretin bolamyz», - dep atap ótti qala basshysy.
«SmArt.Point» jobasy - bul tehnologıalyq keńistik nemese IT-hab, onyń quramyna joǵary tehnologıa men kreatıvti bıznes salasyndaǵy 40 kompanıa engen. Ortalyq táýligine 24 saǵat boıyna, aptasyna jeti kún ishinde isteıdi. Munda sóılesetin bólmeler, oıyn alańdary, sport zaly bar.
