Búgin Almaty qalasynda «Sporttyq Almaty» baǵdarlamasy aıasynda qalada jetinshi velomarafon ótti.

Aqparattyq jáne sporttyq HAB-tan málim etkendeı, 800-ge jýyq áýesqoı ádettegideı «Nurly Taý» bıznes ortalyǵynda bas qosty.  Bul joly olar 9 shaqyrym qashyqtyqty baǵyndyrdy. Velosherý Muxtar Áýezov atyndaǵy drama teatrdyń mańynda aıaqtaldy.

Máre syzyǵyn eńsergen qatysýshylar arasynda baǵaly syılyqtar oınatyldy, keıbiri basty syılyq - velosıpedtiń ıegeri atandy. Solardyń biri Ilá Shmarovoz boldy.

«Men «Goý pro» kamerasyn jeńip ala almaǵanyma kóńilim qulazyp tur edi. Alaıda, keıinnen velosıped jeńimpazynyń nómirin estigende óte qýandym. Bul meniń osy jylǵy besinshi velosherýim. Búgin ákemmen jáne aǵammen keldim. Ózimniń velosıpedim eskirip qalǵan edi. Endi velosherýlerge jańasymen qatysamyn», - dep áserimen bólisti jeńimpaz Ilá Shmarovoz.

Aıta keter jaıt, búgingi velosherý «Sporttyq Almaty» qalalyq baǵdarlamasynyń qoldaýymen 2018 jylǵa josparlanǵan 21 velosherýdiń jetinshisi bolyp tabylady.

«Sporttyq Almaty» baǵdarlamasy megapolıstegi buqaralyq sportty damytý maqsatynda júzege asyrylýda.