Almatyda ornalasqan QR Ulttyq ulanynyń «Ońtústik» óńirlik qolbasshylyǵynda túrli ult ókilderinen quralǵan áskerı qyzmetshilerdiń arasynda qazaq tilin bilýden saıys ótti. Ulttyq ulannyń «Ońtústik» óńirlik qolbasshylyǵynyń baspasóziniń málimdeýinshe, áskerı qurylymǵa qarasty Shymkent, Taraz, Qyzylorda qalalary men Almaty oblysynyń Uzynaǵash aýlynan shaqyrylǵan ulandyq saıyskerler sharaǵa úlken daıyndyqpen kelgen. Saıysqa jeti úmitker qatysyp, óz bólimderiniń namysyn qorǵaǵan.
«Maqal-mátel aıtýdan jarysqa túsken áskerıler arasynda serjant Aleksandr Shelokov qatarlastarynan oq boıy ozyp shyqty. Ol ózin tanystyrýda da dombyrany aıtystyń maqamymen shertip, kórermendi birden baýrap alǵan edi. Shymkentten kelgen ázerbaıjan ultynyń ókili serjant Nuraddın Mustafaev qazaqtyń salt-dástúrin tereń oıly sózdermen jetkizip, parasatty qazaq er-azamatynyń tulǵasyn kórsete aldy. Al saıyskerler ishindegi eń jasy qatardaǵy Aleksandr Mamykınge tótep berer qarsylas bolmady. Aleksandrdyń sóz saptaýy, oı qorytýy, tanym-túısigi men bilimi artymyzda kele jatqan jas tolqyn urpaqtyń shyǵar bıigin kórsetkendeı. Ol osy sharanyń ózine jańa úlgi alyp keldi. Kúni keshe, Otan qorǵaýshy kúni jaýyngerlik paradta shyrqalǵan «Men qazaqpyn» ánin rýhtanyp, arqalanyp aıtty», - delingen baspasóz qyzmeti taratqan aqparatta.
Baıqaý qorytyndysy boıynsha 6698-áskerı bóliminen kelgen serjant Nuraddın Mustafaev 3-oryndy, 7552-áskerı bóliminen qatysqan serjant Aleksandr Shelokov 2-oryndy, al 28237 áskerı bóliminen saıysqa túsken qatardaǵy Aleksandr Mamykın 1-oryndy ıelendi.
