Túrkistan oblysynyń ortalyǵynda Q.A.Iasaýı kesenesiniń aldynda «Ulttyq dombyra kúni» merekesinde 1000 dombyrashy Qurmanǵazynyń «Saryarqa», «Balbyraýyn», Túrkeshtiń «Kóńilashar» kúılerin oryndady. Budan bólek, barlyq aýdan, qalalarda bir mezgilde dombyrashylardyń fleshmoby uıymdastyryldy. Osylaısha jalpy sany 3 myńnan astam dombyrashy ulttyq ónerdi dáriptedi.

Bıylǵy jyly Elbasy Nursultan Ábishuly Nazarbaevtyń Jarlyǵymen jarıalanǵan «Ulttyq dombyra» kúnin túrkistandyqtar keń kólemde atap ótti. Ulttyq dástúr men ónerdi jańǵyrtyp, dáripteýge jol salatyn bul mereke  qolóner sheberleri men sýretshilerdiń kórmesimen bastaý aldy. Sonymen qatar, Q.A.Iasaýı kesenesi aldynda Sh.Qaldaıaqov atyndaǵy oblystyq fılarmonıanyń «Súgir» atyndaǵy ult aspaptar orkestiriniń konsertimen jalǵassa, merekelik kún «Kúı qudireti» kúıshilerdiń oblystyq baıqaýymen qorytyndylandy.

Ulttyq dombyra kúni merekesiniń ashylý saltanatyna qatysqan Túrkistan oblysy ákiminiń orynbasary Ulasbek Sádibekov barsha turǵyndardy osynaý merekemen quttyqtady.

«Dombyra — qazaq halqynyń eń keń taraǵan eki ishekti, kóp perneli mýzykalyq aspaby. Ol – qazaqtar ómirinde mańyzdy oryn alatyn, ózindik mýzykalyq sıpaty bar aspap. Alǵash epıkalyq dástúr sheńberinde jyr, tolǵaý, termelerdi súıemeldeýge qoldanylǵan dombyra keıin aspaptyq shyǵarma – kúı janrynyń qalyptasýyna yqpal etken. XIX ǵasyrda qazaq halqynyń turmysynda anaǵurlym keń taraǵan Mýzykalyq aspap eki ishekti dombyra bolatyn. Ár túrli eskertkishterge, sondaı-aq etnograftardyń jazyp qaldyrǵan eńbekterine júginsek, dombyra jáne ózge halyqtardyń osy tektes aspaptary tipti sonaý orta ǵasyrlarda belgili bolǵan eken. Mysaly, Ábý Nasyr ál-Farabıdiń eńbekterinen tambýr aspaby jaıynda oqımyz. Qazaqtyń halyq aspaby dombyra XIV ǵasyr jazbalarynda kezdesedi. Onyń bastaǵy túri men qurylysy qazaqtyń dombyrasynan aýmaıdy, osyndaı aspap attarynyń uqsastyǵy da olardyń túpki shyǵý tegi bir ekekin kórsetse kerek»,-dedi U.Sádibekuly.

«Ulttyq dombyra kúni» merekesi Túrkistan oblysynyń barlyq aýdan, qalalardyń mádenıet jáne óner mekemelerinde, ortalyq saıabaqtarda, oıyn-saýyq ortalyqtarynda, ashyq alańdarda túrli mádenı is-sharalar ótkizilýde.