Reseılik prımadonna Alla Pýgacheva Pýtınniń saıası baǵytyn múlde qoldamaıdy, Reseıge basqa prezıdent kerek dep dóp basyp aıtty osydan birneshe aı buryn. Reseı halyq artısi, tipti, «únemi uıyqtap júretin» sheneýnikterdi de synǵa aldy. Onyń oıynsha, Reseıdiń búgingi bıligi halyqty tas dáýiriniń deńgeıine jetkizdi. Buǵan AQSH pen Eýropa tarapynan Reseıge salynyp jatqan túrli sanksıalardyń áseri bolsa kerek. Óner ıeleri shet elge shyǵyp, erkin túrde keshterin ótkizýden qalǵan. Sonymen qatar zeınetke shyǵatyn jasty ulǵaıtqan zańnamanyń da parsha-parshasyn shyǵaryp synady reseılik ánshi.

Alla Pýgacheva kim?

Ol – SSSR-diń halyq artısi. Ol – kompozıtor, rejıser, prodúser. Ol – aktrısa, telejúrgizýshi.

Ol – Reseı Federasıasynyń Memlekettik syılyǵynyń laýreaty. «Otan aldyndaǵy eńbek» ordeniniń ıegeri. Túrli tilde 500-ge tarta áni men 100-ge jýyq avtorlyq kúıtabaǵy bar.

Já, aıtpaǵym Alla Pýgachevanyń ómiri emes edi. Reseı úshin mol eńbek sińirgen shoý bıznes patshaıymy ózi nan taýyp otyrǵan eldiń bıligin ashyq synady, prezıdentine qarsy sóıledi. Biraq ol áli halyqtyń súıikti ánshisi. Oǵan kezinde bıliktiń ózi tabystaǵan ordenderin eshkim qaıtaryp alǵan joq. Qanshama jyldar boıy qasyqtap jınaǵan abyroıy qaz qalpynda. Ony Reseı áli de erekshe qurmetteıdi.

Al bizde qandaı?

Bul suraqtyń jaýabyn siz de bilip tursyz ǵoı, solaı ma? «Bılikti synaǵan adamnyń shyǵarmashylyǵyna tusaý baılanady». Buǵan mysal retinde birneshe jyl buryn sahnadan alastatylǵan, osy kúnge deıin sheneýnikter tarapynan qysym kórip kelgen Maqpal Júnisovany keltirse bolady. Bárimizge aıan, ánshi – saıasatker Zamanbek Nurqadilovtiń zaıyby. 2005 jyldary bolsa kerek, kógildir ekran men radıo Maqpal Júnisovanyń shyǵarmashylyǵyn kórsetýdi doǵarady. Sebebi kúıeýi odan buryn bılikke qarsy saıası málimdeme jasaıdy. Osylaısha eldiń súıikti ánshisi gastróldik saparlarǵa shyǵa almaı qalady. Tipti 1937 jyldardaǵydaı «halyq jaýy» keıpin keshedi. Al mádenıet mınıstrligi jumǵan aýzyn ashpady. Bul – bir. Jarynan aıyrylǵan soń da shyndyqtyń izine túsken Maqpal Júnisova bıliktiń nysanyna aınaldy. Oıyn ashyq aıtyp, pikirin bildirýge jan-jaqtan kedergiler keltirildi. «Jarynyń ólimi jaıly shyndyqqa» ánshi on jyldan asa ýaqyt qol jetkize almaı keledi. Bılik Maqpal qara tizimge engizip, sahnadan alastatty. Qalyń kórermenmen qaıta qaýyshqan Maqpal bul taqyrypty qaıta qozǵasa, basyna qandaı kún týary belgisiz.

Al Maqpal Júnisova kim?

Ol da SSRO zamanynan beri sahnanyń tórinde shoý-bıznestiń ystyq-sýyǵyna shydap kele jatqan, halyqty talantymen tánti etken Qazaqstannyń halyq artısi. Sahnada júrgenine 30 jyldan asty. Ol – Qazaqstannyń eńbek sińirgen ánshisi. Kez kelgen týyndyny júrekpen aıtatyn, ánderin sezine biletin, sahnada úlken kisilerge ıilip sálem berip óziniń tekti áıel, tekti ana ekenin kórsete bilgen qazaqtyń erke qyzy ol.   

Qazaqstannyń prımadonnasyna Semeıge kirýge nelikten tyıym salyndy?

Maqpal Júnisovadan bólek qazaq sahnasynyń sánin keltirgen Roza Rymbaeva da sheneýnikter tarapynan qysym kórgen edi. Onyń birneshe jyl buryn Semeıdegi keshi barysynda «roıál joq eken» degen biraýyz sózi úshin Semeıden qýyldy. Eskertpe aıtqany úshin Roza Qýanyshqyzy qala ákimine unamaı qalypty-mys. Syn kótere almaıtyn (syn dep aıtýǵa da kelmes – avt.) qala basshylyǵy Roza Rymbaevaǵa Semeı qalasynda konsert qoıýǵa bes jylǵa deıin tyıym saldy. Alaıda «jaza» merzimi bitpeı jatyp, ákim aýysyp, Rozanyń aıy ońynan týdy.

Halyqtyń súıikti ánshisi Roza Rymbaevanyń sahnada júrgenine 40 jyldan asty. Ataqty «Álıasymen» halyqtyń júregine rýh bergen, «Atamekenimen» Otanǵa degen súıispenshilikti dáriptegen, «Naýryzymen» merekeniń ajaryn kirgizgen ánshiniń orny halyq úshin qashan da bıik.

Mine,  bılik tarapynan bizdegi naǵyz óner adamdaryna degen qurmettiń sıqy osyndaı.