Túrkistan oblysynda 5-6 shilde kúnderi aptap ystyq bolady, dep habarlaıdy "Habar 24".

Aýa temperatýrasy bul kúnderi 45 gradýsqa deıin jetýi múmkin. Qazgıdromet mamandary shildeniń ekinshi jartysynda ǵana kún raıy ózgeredi deıdi. Óńirde jańbyr jaýyp, kún azdap salqyndaıdy.

Aıta keterligi, jaz bastalǵaly balalar arasynda jedel ishek ınfeksıalyq aýrýlary órshı túsken. Máselen Shymkenttegi juqpaly aýrýlar aýrýhanasyna túsken naýqastar sany eki ese artty. Munda jedel-járdem kóligimen keletinder sany aptasyna 1800-ge deıin barady. Bul táýligine shaqqanda 250-300 emdelýshi bolyp sanalady. Dárigerlerdiń aıýynsha, olardyń  barlyǵy birdeı aýrýhanaǵa jatqyzylmaıdy. Ambýlatorlyq em alýǵa múmkindigi barlary emhanalarǵa jiberiledi.

Gúlnár Isabaeva, qalalyq juqpaly aýrýlar aýrýhanasynyń bólim meńgerýshisi:

"Jemis-jıdekterdiń qaýyn-qarbyzdyń pisýine de baılanysty jedel ishek ınfeksıasymen qaralyp jatqan naýqastardyń sany artqan. Biz qaralǵan naýqastardyń barlyǵyn jatqyza bermeımiz. Jaǵdaıyna baılanysty ortasha jeńil túrleri bolatyn bolsa, keńesimizdi berip ambýlatorlyq jaǵdaıda nemese úıde emdelýge keńes berip jiberemiz".

Saltanat Qonys, ınjener-sınoptık:

"Aptap ystyq bizde shildeniń 1 nen bastalyp ketti. Qazirgi kezde 6-7-8 ıaǵnı meıram kúnderi qatty ystyq kútiledi. Negizi shilde aıynyń birinshi onkúndiginde qatty ystyq. Plús 40, +45 gradýs. Shilde aıynda bizde jaýyn-shashyn kútilmeıdi. Tek 20-nan keıin ǵana jaýyn-shashyn bolýy múmkin".