Batys Qazaqstan oblysynyń Zelenov aýdanyna qarasty Darıan aýylynda IT-synybymen jabyqtalǵan alǵashqy mekteptiń ǵımaraty paıdalanýǵa berilmek. 100 balaǵa arnalǵan ınternat pen 300 oryndyq jańa mekteptiń kabınetteri sport, akt zaldary zamanaýı qural-jabdyqtarmen qamtamasyz etilgen.
Aqparattyq tehnologıalar synybynda sabaqtar elektrondy oqýlyqtyń kómegimen ótkiziletindikten, oqytýshylar arnaıy daıyndyq kýrsynan ótti. Osy tektes synyptar jańa oqý jylynda aımaqtyń 14 mektebinde ashylatyn bolady. Al aýdannyń barlyq shaǵyn jınaqty mektepteri Bilimbook jobasy boıynsha ǵalamtorǵa qoly jetpeıtin mektepterge arnalǵan derbes oqytý qurylǵylaryna, ıaǵnı 500 transformer-kompúterge ıe bolady. Bilimbook – eldegi Nazarbaev zıatkerlik mektepteri júıesinde synaqtan ótken ozyq úlgili, jańa ádistemeli sabaqtar júktelgen kompúter-transformer. Ol ınternetke qosylmaı-aq paıdalanýǵa jaramdy. Qazaq, orys, aǵylshyn tilinde baǵdarlamalar júktelgen Bilimbook jady 2-3 aı saıyn jańartylyp turady. Sabaq eki tilde (qazaq jáne orys tilderi) júrgiziledi. Arnaıy mamandar kásibı biliktiligin arttyrý kýrstarynan ótken.
Sondaı-aq aýdanda budan ózge de jańa nysandar el ıgiligine berilmek. Astana qalasynyń 20 jyldyǵyna oraı, eki saıabaq ashylyp, aýdandyq tarıhı-ólketaný mýzeıiniń tusaýy kesiledi dep kútilýde.
Jańa qurylys nysandarynyń sapasyn teksergen óńir basshysy Altaı Kólginov turǵyndarmen júzdesip, aýyl halqyn elde jáne oblys aýmaǵynda atqarylyp jatqan jumystar jóninde habardar etti.
Sondaı-aq, Qurylysy bitken mektep nysanyn aralap kórgen oblys basshysy zaman talabyna saı salynǵan bilim oshaǵyna oń baǵa berdi. Elbasy tapsyrmasyna sáıkes ashylǵaly otyrǵan alǵash İT synyp jańa jetistikterge bastaıtyn zor múmkindik bolaryna senim bildirdi.
