Jýyrda Oral qalasynda tehnıkalyq jáne kásiptik bilim berý uıymdarynyń stýdentteri arasynda oblystyq «Sıfrly oqý orny» ınovasıalyq jobalar jarysy uıymdastyryldy. «Rýhanı jańǵyrý» baǵdarlamasyn tirek etken baıqaýǵa BQO-nyń 14 kolejinen 27 úmitker qatysyp, óz jobalaryn usyndy. Baıqaý nátıjesinde eki seksıa boıynsha Oral qalasyndaǵy J.Dosmuhamedov atyndaǵy pedagogıkalyq kolej stýdentteriniń jobalary úzdik shyqty.
Oblystyq bilim basqarmasynyń mektepke deıingi, jalpy orta, tehnıkalyq jáne kásiptik bilim berý uıymdarynyń oblystyq oqý-ádistemelik kabınetiniń uıymdastyrýymen ótken baıqaý stýdentterdiń ınovasıaǵa degen qyzyǵýshylyǵyn arttyryp, sıfrlyq saýattylyqtaryn damytýdy kózdedi. Oblystyq oqý-ádistemelik kabınetiniń bólim basshysy Raıgúl Qýanshálıevanyń aıtýynsha, atalmysh baıqaý alǵash ret ótkizilip otyr.
– Elbasymyz bıylǵy Joldaýynyń «Adamı kapıtal – jańǵyrý negizi» baǵytynda «Jumys berýshilerdi tartý arqyly jáne halyqaralyq talaptar men sıfrlyq daǵdylardy eskere otyryp, tehnıkalyq jáne kásiptik bilim berý uıymdaryndaǵy baǵdarlamalardy jańartý kerekpiz» dep atap ótken bolatyn. Baıqaý osy tapsyrmaǵa oraı ótkizildi, – dedi R.Tilekqabylqyzy.
Oral gaz, munaı jáne salalyq tehnologıalar kolejinde ótken baıqaý «Málimetter bazasyn ázirleýdegi úzdik joba», «Elektrondy-sıfrlyq resýrs ázirleý salasyndaǵy úzdik joba», « Mobıldi qosymshalardy ázirleý salasyndaǵy úzdik joba», «Úzdik anımasıalyq joba», «Damytý oıyndarynyń úzdik jobasy (áleýmettik jeliler úshin)» sekildi bes baǵytty qamtydy. Ádilqazylardyń sheshimimen birinshi seksıada J.Dosmuhamedov atyndaǵy pedagogıkalyq kolejiniń stýdenti Andas Qajymovtyń «Damytý oıyndarynyń úzdik jobasy» baǵyty boıynsha «LatynQaz» oıyny taqyrybyndaǵy jobasy úzdik dep tanyldy. Ekinshi seksıada da atalmysh kolejdiń stýdenti Asylhan Ájimurat birinshi oryn aldy. Asylhan elektrondy-sıfrlyq resýrs ázirleý salasyndaǵy úzdik joba ( elektrondy oqýlyqtar, elektrondy oqý quraldary) baǵyty boıynsha «Latyn álipbıi» elektrondyq oqý quraly taqyrybynda jobasy men erekshelendi. Adobe Flash baǵdarlamasymen jasalǵan jobany bastaýysh synyptan bastap joǵary synyp oqýshylaryna deıin paıdalana alady. Balalardyń latyn álipbıin eske saqtaýy úshin qajettiligimen qundy joba qoldanýshysyn arnaıy anımasıalarmen qyzyqtyrady. Munda 32 latyn qarpi jáne óz pernetaqtasy bar. Jobada 16 tapsyrma berilgen. Osynyń bárin jan-jaqty oılastyryp, baǵdarlamaǵa engizgen Asylhan buǵan deıin de talaı márte oblystyq baıqaýlarda top jarǵan bolatyn.
