QR Mádenıet jáne sport mınıstri Arystanbek Muhamedıuly mánerlep syrǵanaý sheberi Denıs Tennń pyshaqtalýyna qatysty pikir bildirdi, dep habarlaıdy Qamshy.kz aqparat agenttigi.

Mınıstr Facebook-tegi paraqshasynda sportshynyń basynan ótken jaǵdaıdy úlken qaıǵy dep atady.

«Almatydan sumdyq jańalyq keldi. Mánerlep syrǵanaý sheberi Denıs Ten reanımasıa bóliminde jatyr. Pyshaq jaraqatynan kóp qan joǵaltypty. Almaty qalasy ortalyq klınıkalyq aýrýhanasynyń dárigerleri sportshynyń 3 lıtr qan joǵaltqanyn aıtyp otyr. Olar Denıstiń ómiri úshin arpalysyp jatyr.

Bul úlken qaıǵy. Mıǵa syımaıdy. Qazir bárimiz Denıs Tenniń aman qalýyn tilep otyrmyz», - dep jazdy Arystanbek Muhamedıuly.

Aıta keteıik, búgin mánerlep syrǵanaý sheberi Denıs Tendi pyshaqtap ketti. Almaty İİD atalmysh jaıttyń saǵat 15:00 shamasynda bolǵanyn aıtty.

«Búgin 19.07.2018, saǵat 15:00 shamasynda Qurmanǵazy jáne Baıseıitova kósheleriniń qıylysynda Denıs Ten kóliginiń aınasyn urlamaq bolyp jatqan jerinen belgisiz eki adamdy kórip qalǵan. Sol jerde kıkiljiń týyp, Denıs Tenge pyshaq jaraqaty salynǵan.

Atalmysh iske qatysty tergeý jumystary bastalyp, kúdiktilerdi anyqtaý jáne ustaý sharalary júrgizilýde. Almaty İİD-niń búkil jeke quramy jumyldyryldy», - delingen habarlamada.